Manchester United chuan Thawhlehnia Champions League match hmachhawn turin Atletico Madrid mual an luhchhuah dawn a, mahse an squad-ah hliam avangin harsatna an tawk chhunzawm zel a ni. Inrinni-a Premier League match-a Tottenham an inhnehtawk ṭum khan Luke Shaw leh Kobbie Mainoo te chuan hliam tenau an tawh avangin, Spain khawpui pan tur Manchester United squad-ah hian an tel thei ta lo a ni.

Thawhṭanni zinga Carrington training ground-a United inbuatsaihna neihah Shaw leh Mainoo te hi hmuh an ni lo a, Spain lama an thlawh chhuah hmain team an zawm hman lo a ni. Tlarhnung veilam ruak hi United tan buaina lian tak a ni a, a chhan chu left-back dang Noussair Mazraoui leh Patrick Dorgu te pawh ram tana an inlan ṭuma an hliam avangin an la inenkawl mek bawk a ni.

Striker Benjamin Sesko pawh hliam avangin a la chawl chhunzawm zel a, a chawn hnuai lam (shin injury) hliam avang hian a kir leh hun tur pawh head coach Michael Carrick chuan a sawi tlang thei rih lo a ni. Carrick chuan, "Thawhlehnia inkhel atan Shaw leh Mainoo te an inpeih rih lo a ni. Inrinni inkhelah khan harsatna an nei a, eng chena thui nge an chawlh ngai dawn tih kan la finfiah mek a ni. Sesko chungchangah pawh tun kar chhung hian test dang kan la nei leh ang a, thutlukna dik tak siam tumin kan la nghak rih a ni," tiin a sawi.

Tlarhnung lamah hliam vangin harsatna an tawk nasa hle mah se, United hian academy rawlthar an ko chho a. Academy chhuak kum 18 mi defender Dan Armer chu travelling squad-ah ko telin Metropolitano stadium-ah bench aṭangin a inlan thei dawn a ni. Hemi rual hian November 2025 hnua a vawikhat nan defender Matthijs de Ligt pawh matchday squad-ah a rawn tel leh thei dawn ta bawk a ni.

Carrick chuan squad dinhmun sawiin, "Player ṭhenkhat kan chan avangin buaina tlem te kan nei a, mahse chuti anin player indaih lohna lian tak kan nei em em lo. Dan-a tan heng iang Champions League zan liana team bula awm leh boruak tawn hi thil ṭha tak a ni. Matthijs de Ligt-a rawn kir leh pawh kan lawm hle a, hun rei tak a chawlh hnuah training zawm chhoin he dinhmun thleng tur hian a thawkrim em em a ni. Khelmuala chhawr nghal pawh ka huphurh lo a, mahse hliam nei leh thei a nih avangin hlawhtling taka a rawn kir leh theih nan tlem a dawhthei taka chhawr chhoh zel kan tum dawn a ni," tiin a sawi.

Hemi rual hian team captain Bruno Fernandes-a fitness chungchanga hlauthawng te chu Carrick chuan a hnem bawk. Kum 32 mi hian Manchester City leh Fulham an hmachhawn hma khan fitness test a neih a ngai a, Portugal manager Jorge Jesus pawhin Bruno hian na tuar chungin club tan game a khel hram hram niin a lo sawi tawh bawk. Inrinni-a Tottenham nena an inkhelh ṭum pawh khan enkawl a ngai leh hle a ni.

Mahse Carrick chuan an captain chungchangah hian buaina a awm loh thu sawiin, "Bruno-a'n na tlem a pai tih chu thil langsa a ni a, hetiang hi football-ah chuan a thleng fo ṭhin. Player tam tak hian na tlem te pai chungin game an khel ṭhin a, keipawh ka career-ah khan match 80% vel chu harsatna tlem te nei chungin ka khel ṭhin a ni. Hetiang hi thil duhawm tak ni lo mah se, thunun theih a ni tlangpui ṭhin. Bruno hian team tana a inpekna avangin na tlem a nei chung pawhin a khel a, tunah chuan a dinhmun a ṭha tawh hle a, Thawhlehna inkhel hmachhawn tur hian a inpeih at tawh a ni," tiin Fernandes-a chungchang a tlip ta a ni.