Bournemouth laka 3-0 a an tlawm hnuah ban tura ngaihna lian tak awm mah se, Manchester United chuan head coach Michael Carrick-a chu a hna a chhunzawm zel zawk dawn tih an rel ta.

A zawnin an che chhe zui zel a, Pathiannia Bournemouth laka 3-0 a an tlawm hnu khan Carrick hi ban nghal mai tura ngaih a ni a. Ani pawhin an match zawhah a hmabak chungchang sawiin a thaw a veng vak lo tih a lang.

Inkhelh zawhah Carrick chuan, "Hmun khirh takah kan ding mek a, hei hi thup rual a ni lo. Hmalam hunah eng nge thleng dawn a, eng nge lo thleng zui dawn tih phei chu ka hre bik lo a ni. He club tana ka theihna sang ber chhuah reng hi ka thil tih tur a ni a, tunah pawh ka thlak danglam lo ang. Ka hna hi ka ngaina em em a, mawhphurhna lian tak pawh ka la a ni - a thil thleng lehzel tur chu kan nghah a ngai ang," tiin a lo sawi a nih kha.

Hetianga a ṭawngkam aṭang hian amah ngei pawhin ban a nih a inrin tawh hle a. Mahse Manchester United chief executive Omar Berrada, director of football Jason Wilcox, bakah club neitu Glazer chhungkua leh Sir Jim Ratcliffe te chuan pawimawh taka inbiakna an neih hnuah Carrick-a hi head coach atan chhawr chhunzawm zel zawk turin thutlukna an siam ta a ni.

He thutlukna hian Manchester United-a buaina thleng mek hi manager/coach chungchang chauh a ni lo tih a tilang chiang hle a, buaina thuk zawk an nei a ni tih tlang takin a phochhuak a ni. Thawhlehni zing khan Carrick-a'n training a hruai leh tawh a, Stamford Bridge-a Chelsea an luhchhuahna tur atan pawh ruahmanna a siam chhunzawm nghal mek a ni.

Bournemouth an hneh loh hnu khan United fan-ten mual chhunga player-te chungah an lungawi loh thu an chhuah laiin, Carrick-a tan erawh au thawm an chhuah hluah hluah a, chuvang chuan club thutlukna hian fan-te lung a tiawi hle ngei ang.

He thutlukna hian squad chhunga player-te rilruah eng nge a thlen dawn tih erawh fiah taka hriat a la ni rih lo a, Chelsea laka an khelh dan aṭangin engkim a lang chiang ang. Carrick-a tana player thlan tur chungchanga ngaihnawm ber tur chu Bruno Fernandes-a dinhmun a ni. Champions League-a Como laka an tlawm ṭum khan Carrick-a tactics hman dan a sawisel avangin Bournemouth match-ah khan khelmualah Fernandes hi chhawr a ni lo a ni.

Carrington-a Thawhlehni training-a tel ve Fernandes-a a kalsan chungchangah hian Carrick-a chuan hremna vanga dah hla a nih loh thu leh, "football thil taka" thutlukna siam a nih thu a sawi a, mahse he Portugal international hian he match-ah hian minute khat pawh a khel ta lo a ni.

Hemi hnu hian social media hmangtute chuan Instagram video pakhat Fernandes-a'n 'like' a nei tih an hmu a, chu video-ah chuan, "Mi rinawm tak chu engmah ngaihsak lo khawpa an awm thlengin nawr liam ngai suh," tih thuchah a ziahluh a ni.

Chelsea an hmachhawn hma hian Premier League relegation zone chunga mi teuh te, 16-naah United hi an ṭhu mek a. Chelsea an luhchhuah hnu hian international break thlen hmain Roma leh Aston Villa te mahni mualah an mikhual zui leh ang.