Manchester United legend Wayne Rooney chuan mahni mual Old Trafford-a Bournemouth laka 3-0 a an tlawm hnuah, United player-te inkhelh dan leh an mizia chu rim takin a sawisel a, dressing room-a va lut a, an mawngah halpuah chhit khum hial a chak thu a sawi chhuak.

United hi match 11 an khelh tawhah vawi hnih chauh an chak avangin head coach Michael Carrick-a dinhmun pawh a derthawng takzet tawh a ni. Bournemouth an hneh loh ṭum khan fan-ten Carrick hi chibai buk liam mah se, player-te erawh mipuite chuan an au el thung a ni.

'Stick to United' podcast-a a ṭawngchhuahnaah, kum 41 mi Rooney chuan United player-te chu khelmualah an thawkrim tawk lo hle nia tarlangin: "Player-ten ṭanfung leh chhan tur an nei tlawt lo. An chet dan leh khelh dan hi a fair lo takzet a ni. Fan-te ka en a, hetiang taka player-ten khelmuala ball an um peih lo leh an tlan peih lo hmuh hian an hmel aṭangin an thinrimna leh an rilru natna ka hmu thei a ni. Rayan-a'n Martinez-a a rawn tlan pelh phei khan ball um zui pawh an tum miah lo a, he thil hian rilru a titawptai takzet a ni," tiin a sawi.

Rooney chuan sawi chhunzawmin, "Kei pawhin goal ka khung thei a, theihna ka nei pawh a ni thei, mahse ka tlan a, team tan ka inthawh thin. Tun a player-te hian chutiang chu an ti ve tawh reng reng lo. Kha dressing room-ah khan luh a, 'Eng thil nge in tih kual mai mai hi? Hetiang te chu inkhelh dan chi a ni em ni? Kawr hi ha tlakah in inngai em ni?' ti a va an khum hi ka chak a ni. An mawngah hian halpuah chhit sak hlak an mamawh a ni, engmah an ti lo thlawt," tiin rilru puakchhuah lian tak a nei a ni.

United tana goal khung hnem ber Rooney hian, Carrick-a'n season liam taa lailawk (interim) a an team a enkawl ṭuma pathumna a nihpui a, Champions League inelna a tlinpui khan club board leh player-te hnenah beiseina der a siamsak ta zawk nia tarlangin, hmun hrang hrang siksawi zawng zawng pawh a tiṭhuanawp zawk nia a hriat thu a sawi bawk.

"Tuna kan team hi top team an ni lo a, mid-table team lek an ni. Mahse mid-table team dangte ka thlir hian an thawkrim a, an tlan a, ball an chhuh zui thin. Heng player-te hian an nihna aia sangah an inngai a ni. Wolves leh Brentford aṭanga player an lakluhte pawh hian an theihna tawkah an che ṭha a ni maithei, mahse Manchester United hi a sang zawk thleng pui tur khawpin an tling tawk lo a ni. Carrick-a'n Premier League title 5 leh Champions League a lo chawi tawh a, he club-a nomawi lak dan leh a thleng tur phut zat zawng zawng a hre vek, mahse tun a player-te hian an zah lova, an palzut mai mai a ni," tiin a tlip a ni.