Inrinni zinga Stamford Bridge-a Chelsea an hmachhawn turah, pressure hnuaia awm mek Manchester United manager Michael Carrick chuan team enkawlna hna hi a la chhunzawm rih dawn tih club thudawnnate leh Press Association chuan an nemnghet.

United hian inelna hrang hrangah a zawnin match riat (8) ngawt hnehna chang lovin an che chhe tawh a, inelna hnuhnung bera 3-0 ngawta tlawmna an tawh hnu khan Carrick-a hmabak leh hmakhua hi a thim hle nia ngaihna a lian hle a ni. Mahse Thawhlehni khan Carrington training ground-ah hian Carrick-a'n player-te training a ho leh nghal a, United hotute nena inbiakna pawimawh tak (crisis talks) an neih hnuah Carrick hi hmun pek zui rih an rel ta zawk a ni.

United thudawnnate chuan Carrick hi, a reilote atan pawh nise, a hmabak hmachhawn a, Chelsea nena an inkhelh turah hma a sawn tir thei em tih fiahna hun ṭha pek a nih thu an sawi. United hotute hian thutlukna danglam tak siamin (U-turn), club chanchina an chet chhiat ber mawhphurhna avanga Carrick-a tana banna thupek chhuah mai loin, muangchangin an thil ruahman an siksawi ta a ni.

Manchester United hotute hian Carrick-a thlaktu tur hming langsar zual - Eddie Howe leh Julian Nagelsmann te pawh an rilruah an dah nia sawi a awm a. Hetiang a nih lai hian Stamford Bridge-a mualneitu Chelsea laka point hmuh leh chhoh ngei tumin Carrick leh a naute hi an inbuatsaih chhunzawm mek a ni.

Carrick-a tana hmabak hi a awlsam dawn lo chiang a, United chhungril boruak leh neitute dinhmun pawh a muanawm loh hle nia sawi a nih laiin, khelmual chhunga an chet chhiat zui zel erawh pawi tak a ni. Hetianga an dinhmun tlahniam mek siamṭha tura inbuatsaihna hi thil awlsam tak a nih loh avangin, Stamford Bridge-a Inrinni chawhma lama an match khelh tur hi Carrick-a hmakhua leh a thutlukna hnuhnung ber thlentu pawimawh tak atan a ding ta a ni.