Manchester United manager Michael Carrick chu kar tawpa Premier League-a Chelsea an luhchhuahna turah a nihna a la chelh chhunzawm dawn ta.

Pathiannia Bournemouth laka 3-0 a an tlawm hnu khan, a zawnin match pariat chhung vawikhat mah an chak lo ta a, Carrick hi ban a nih mai an lo beisei tawh hle a ni.

Mahse chief executive Omar Berrada, director of football Jason Wilcox leh co-owner Glazer family te bakah Sir Jim Ratcliffe te chuan inbiakna pawimawh tak an neih hnuah, Carrick hi head coach atan chhawr zui zel turin thutlukna an siam ta a ni.

United chuan kum 45 mi hi tun dinhmun khirh tak aṭanga team chhanchhuak turin hun ṭha an pe nawn leh dawn tih an sawi a, hemi rual hian player-te pawhin mawhphurhna an lak a ngai tel bawk a ni.

Hei hian United-in a zawnin match 8 chhung hnehna an chang lo leh, season tluana match 12 an khelh tawha vawihnih chauh an chak chungchanga buaina thleng mekah hian Carrick chauh chu mawhphurtu a ni bik lo tih pawmna a ni thei bawk. Kar liam ta khan Champions League-ah Como lakah 4-1 ngawta an tlawm avangin harsatna an lo tawk tawh bawk a ni.

Thawhlehni zing khan Carrick hian a zia pangngai angin zing dar 7:30-ah Carrington rawn thlengin training a rawn ho a. Thawhtanni chawhma dar 1:50-ah Under-21 ten Hull City an hmachhawn ṭum khan khelmualah inlanin tlai dar 5:00 thleng an inkhel a thlir bawk a ni.

Wilcox leh Berrada te pawh Thawhtanni zing dar 9:00 aṭang khan Carrington-ah an awm tawh a, Carrick-a hmabak tur chungchang sawi hoin inbiakna an nei a. Stamford Bridge-a an inkhelh hunah team aṭangin chhangletna ṭha tak hmuh beiseiin rinna an nghat zui ta rih a ni.

United hian hmunruak siam a, manager thar ruat an thlang a nih chuan Eddie Howe leh Julian Nagelsmann te chu a thlaktu atana duhsak berte an ni.