Manchester United manager hlui Ruben Amorim chuan an captain hlui Bruno Fernandes chu AC Milan-ah zui tir leh a duh nia sawi a ni a, mahse he transfer-ah hian he player hlawh leh a man zawng hi harsatna lian tak a ni maithei.

United captain hi head coach Michael Carrick nen an inkar a ṭha lo hle a, kar liam taa khualmualah Como laka 4-1 a an tlawm ṭuma Carrick-a tactics hman dan a sawisel avangin buaina a chhuak a ni.

Hemi hnu hian, mahni mual Old Trafford-a Bournemouth laka 3-0 a an tlawm ṭum khan Carrick chuan Fernandes hi bul ṭantir lovin bench-ah a ṭhuttir a, second half-a warm-up nei tura a hrilh hnuah pawh khelmualah a luhtir ta miah lo a ni. Fernandes hi social media-ah pawh a chet dan avangin club lungawi lohna a thlen nawn leh a, "Mi rinawm chu engahmah ngai tawh lo khawp dinhmun thlengin nawr suh," tih thupui tarlan a nihna video pakhat chu a 'like' a, hei hi club lama an hotute laka a rilru dik tak pholangtu nia ngaih a ni.

Fernandes-a contract hian Old Trafford-ah tun season tawpah zawh a hmabak a, mahse United hian kum khat pawhsei theihna option an kawl thung. Chuti chung chuan, an inkar a chhiat chhoh tak avangin January thlasik transfer bazar inhawng turah chhuahna hun ṭha a rawn awm thei dawn a ni.

Italian chanchinbu Calciomercato tarlan danin, San Siro hi he Portugal international tana a thlenna thar tur a ni maithei. Fernandes-a contract-ah hian ram dang club-te tana hman theih tur release clause zep a ni a, ramsawn club-te'n £54million vel an thehchhuak a nih chuan Premier League a chhuahsan thei a ni.

Mahse, he a man zat hi AC Milan tan chuan a to hle dawn a, a bikin he player hlawh sang tak—season khata £8.54m vel nia ngaih—pe tur hian Italian club hi an buai ve hle dawn a ni. January thlaa a chhuak tak tak a nih chuan, Milan leh Fernandes te hian inremna thar zawn a ngai ngei ang.

Amorim-a'n United a enkawl reilote chhung khan Fernandes hi player pawimawh ber zinga mi a ni. Portuguese manager hi a 3-4-3 formation lakah a ṭang nghet hle a, Fernandes hi Casemiro emaw Manuel Ugarte emaw nen tlar lailiah a chhawr ṭhin. Amorim-a hnuaiah Fernandes hian inelna hrang hrang match 59 a khelhah goal 20 khungin assist vawi 19 a nei a, United inelna lama an hnufual hle lai pawha an player tangkai ber a ni.

AC Milan-ah chuan Fernandes hi tlar hma lamah a rammi Goncalo Ramos-a hnung chiahah chhawr an rilruk thu Italy chanchinbute chuan an tarlang. Amorim chuan United laka a hmangaihna a la danglam loh thu sawi mah se, Carrick-a hmakhua chungchang erawh a sawi duh lem lo.

Amorim chuan, "A pawimawh ber chu keimah hi Milan manager ka ni a, chu chu ka zah takzet a ngai a ni. Manchester United ka zawm ṭuma ka thil lo sawi—kha club leh a chhunga mite ka hmangaih em em mai kha a la dik reng a ni. Hemi hnua thil thlengte avang hian engmah a danglam chuang lo. Hei chiah hi he chungchangah hian ka sawi duh a ni. Hma lam ka pan tawh a, club ropui tak dangah ka awm tawh a ni. Ka club Milan-ah hian chinfel tur thil tam tak kan nei a ni," tiin a sawi.

"Ka hna, ka team, ka player-te leh ka staff-te chungah chauh rilru ka fuktir a, club dangah engnge thleng tih lam ka ngaiven rih lo. Mahse, Manchester United nena kan hun liam tawha thil thlengte kha a pawimawh ber lo. Kha club ka zawm tirha ka rilru neih kha tun thlengin a la ngai reng a, he club hi ka la hmangaih reng a ni," tiin a sawi bawk.