Premier League-in Manchester City laka thubuai a neihah independent commission chuan thutlukna siamin, City-in sumdawnna thuthlung dik lo (sham commercial contracts) leh sum lakluh phuahchawp (inflated revenues) hmanga hlawhtlinna an lo chan ṭhin thu an tarlang a. Hei hian Pep Guardiola-a hnuaia City hlawhtlinna chu hriatpuina hliauhkhuhtu (asterisk) a neihtir tak avangin, Manchester United ṭantute chuan Sir Alex Ferguson-a ropui zawk zia a pholang chiang hle tih an sawi uar thar hle a ni.
Guardiola hian Ferguson-a treble lak chu lo nihpui ve tawhin, a zawnin Premier League title vawi li lai lo la tawh mah se, Old Trafford-a Ferguson-a nomawi lak zawng zawngte erawh tlema sawisel tur emaw rinhlelhna pakhatmah a awm ve lo thung. Guardiola hi tunlai khawvela football thluak ṭha berte zinga mi ni mah se, City hlawhtlinna erawh sum hman dan dik lo avangin a hmingchhe chho ta a ni.
He boruak karah hian Wayne Barton-a lehkhabu thar ziah 'Fergie: The Lost Tapes' tih chu a tlangzarh a ni a. He lehkhabuah hian Piccadilly Radio reporter hlui Tom Tyrrell leh Ferguson-a te inbiakna, mi tam zawkin an la hriat ngai loh chu tarlan a ni. Kum 1986-a Old Trafford a zawm tirh aṭanga kum 2013-a a chawlh thlenga Ferguson-a hun harsa paltlang dante leh hlawhtlinna a zawn chhoh dante a chuang a ni.
Lehkhabu tarlan pakhatah chuan, September 1989-a Maine Road-a Manchester City laka 5-1 ngawta United an tlawm ṭuma Tyrrell-a'n Ferguson a kawmna a langsar hle. Khatih lai khan Ferguson chu chanchinbu mi leh ṭantute lakah sawisel a tawk nasa hle a. Mahse Ferguson chuan, "Mimal thila min huat vang a ni lo, Manchester United manager ka nih vang zawk a ni. United manager-te hi chu chanchinbute sawisel rawn an ni ziah ṭhin. Ziah tur an neih loh chuan United chanchin ziah hi chanchinbu hralh theihna a ni tlat a ni," tiin a sawi a.
A sawi zawmnaah, "Ka hna hi dik tak leh rinawm takin ka thawk a ni tih ka hria. He ramah hian he hna hi keimah aia thawk ṭha thei tur manager an awm lo. Chu chu keiin ka hria a, he club-a mite pawhin an hria a ni. Chuvang a ni ngei ang kan director-te pawhin kum thum daih contract thar min pek. Thil lo hlawhtlin tawhte an hria a ni," a ti bawk.
A chhungte dinhmun chungchang sawiin Ferguson chuan, "Tupawh mai hi chanchinbu thuziak vang hian an lungawi lo vek a, mahse chhungkua kan inlungrual a, hma lam kan pan mai tur a ni. Zing tin Manchester United manager anga he hmun ka rap lut thei hi ka nun puma ni ropui ber a ni ziah. Club ropui tak leh ṭanpuitu ṭha tak tak nei, rilru dik tak nei tlangvalte ka enkawl a ni. Kan player-te hian club tan an thinlung zawng zawng an hlan a, ka zah em em a ni," a ti.
Barton chuan Guardiola-a'n sum tam tak senga team ṭha a din zung zung theih laiin, Ferguson erawh chuan hun rei tak chhung rilru sukthlek (mentality) thlak kual nan leh team din thar nan tha tam tak a seng tih a tarlang a. Ferguson hian 1986-a mawhphurhna a lak hnuah, a nomawi hmasaber 1990 FA Cup-ah a la a, kum 26 hnuah 1992-93 khan league title a la chauh a ni. Hetianga harsa taka United din puitu a nihna hian manager ropui ber dinhmun a luahtir reng a ni tih a nemnghet a ni.
