Manchester United chuan Old Trafford-a ticket touting (ticket lak khawm a, a aia to taka hralh chhawn) buaina a tawp thlenga chinfel a nih theih nan specialist thar lakluh an tum ta. Red Devils te hian he buaina hi hun rei tak lo hmachhawn tawhin, ticket man to taka lo hralh chhawn hmangte avang hian club leh fan-te an buai fo ṭhin a ni.

United chuan he buaina hi hrâm taka hmachhawn an tum ta a. Club chuan an official website-ah 'Supporter Escalations Executive' hna hmun ruak an tarlang a, he hna chelhtu hian ticket sem dawt leh chungchang chhui zui hna a hruai ang.

Website-a thuchhuah an siamah chuan: "He hna hi ticket touting do nana Club thiltum puitlin nana pawimawh tak a ni a, fan-te chungchanga chhui zui hna khirh tak tak te, hremna pek, appeal leh thil harsa zawk ngaihtuahna hna a hruai dawn a ni," tiin an tarlang.

Ruahmanna awm danin AI, technology leh spreadsheet-based data analysis-te hmangin ticket hralh dan leh a kalphung te enfiah ṭhin a ni ang a. Executive thar hian Old Trafford-ah hmun hma neiin, fan-te tan 'primary point of contact' ber a ni ang a, ticket eirukna chhui zui hna a pui ber ang.

Manchester United-in he hna thar an siam hma hian, ticket touting-a inrawlha an syak season ticket holder 685 ngawt mai inkhel en thei lo turin an lo hrem (ban) tawh a, mahse an zinga ṭhenkhat chuan thiam lohna an neih loh thu an la au chhuahpui reng a ni.

He thutlukna avang hian fan tam tak an lungawi lo hle a, thla liam taa Manchester City nena Manchester derby an khelh ṭum khan lungawilohna lantirin demonstraton an lo nei hial a ni.

Fan group 'The Red Army' chuan thuchhuah siamin: "Hei hi khelmuala match en ṭhin fan-te aiawha thuchhuah a ni a, club chet dan avanga harsatna tawk supporter-te au chhuahna a ni. Hei hi Manchester United buaina chauh a ni lo va, Premier League chhunga club zawng zawng buaina a ni a, hma lak vat a nih loh chuan football hmakhua hian chhiat lam a pan zel dawn a ni," tiin an tarlang bawk.