Manchester United rawlthar theihna ngah tak JJ Gabriel chuan thla liam ta khan Old Trafford chhuahsan a dil thut a, hei hian mipui leh chanchinbumite mit a la nghal hle. He rawlthar hi Michael Carrick-a enkawl first-team squad-a inlan mai tura beisei a nih laiin, United hnena a inziahluhna (registration) sut a dil a, mahse United chuan a ngenna hi an lo hnawlsak a ni.
Kum 15 mi forward hian season liam ta khan United academy tan game 29 a khelhah goal 26 ngawt mai khungin U18 Premier League Player of the Season chawimawina a dawng hial a. Senior team debut la siam lo mah se, kumin nipui pre-season chhung zawng khan Carrick-a hnuaiah first team tan a lo inlan kual nual tawh a ni.
Gabriel-a chungchangah hian United head coach Michael Carrick chuan, "Ka lo sawi tawh ṭhin ang bawk kha ka sawi nawn leh ang: ani hi naupangte chauh a la ni a, chanchinbumite sawi zui leh mipuite thlir nasat lutuk lakah hian kan fimkhur a ngai a ni. Puitling taka ngaihtuah chungin a hmakhua kan thlir sak a ngai. Boruak hi amahin a la inrem chawp mai ang," tiin a sawi.
Thla liam taa Carabao Cup-a Brighton an hmachhawn ṭum khan Gabriel hi senior team tan a vawikhat nan a inlan theih beisei a ni a. Mahse, club chhuahsan a dil zui tak avangin squad aṭangin Carrick chuan a thlang ta lo a, hei hian Spanish club lian Barcelona leh Real Madrid ten an lakluh mai an tum nia sawina a ti tam chho ta hle a ni.
United nena an inziahluhna sut tura a dil hma deuh khan, Gabriel hian follower 857,000 zet a neihna a Instagram account chu a lo ti-ruak vek tawh a. Mahse, thla liam ta khan a thutlukna hi thlak lehin, post pathum a dah let leh ta a ni. Chung post pahnihah chuan Nike nen kum 2021 leh 2025-a contract an ziah lai thlalak a dah a, post dang pakhatah chuan Premier League-a goal khung hnem ber Alan Shearer-a hnen aṭanga U18 Player of the Season chawimawina a dawn lai a dah bawk. A personal coach Jack Hunter nena an training clip te pawh a Instagram stories lamah a tarlang tel bawk a ni.
Manchester Evening News-in a tarlan danin, Gabriel hi tun hnai khan Barcelona khawpui kiang Castelldefels-ah a personal coach Hunter leh specialist coach dangte nen training an nei a, hei hian Barcelona a pan mai dawn nia sawina a ti alh zual hle. Old Trafford chhuahsan a dil aṭang khan Carrington-a United training facility-ah a la inlar leh miah lo a ni. Gabriel leh a chhungte hian Barcelona zawm hi an duh hle nia sawi a ni a, Real Madrid pawhin he rawlthar hi an ngaihven ve bawk.
Thawhlehni hian Gabriel hi kum 16 a tling tawh dawn a, hei hian United tan hun a tlem zia a tilang. Kum 16 a tlin rual hian European passport a neih tel avangin England pawn Europe club dang a zawm thei tawh dawn a ni. United hian kum 17 a tlin hma chu professional contract an ziahpui thei lo a, ram danga a insawn tur pawh dan theihna an nei lo bawk.
Hetiang a nih lai hian, Barcelona sporting director Deco chuan Gabriel chungchang an sawizawm chu a la thutak lo hle. Portugal Football Summit-ah Deco chuan, "He naupang chungchangah hian sawi tur a awm lo. Player-te hi kan club nena sawizawm an nih ṭhin chu thil thleng pangngai a ni a. Naupang te pawh nise sumdawnna lian tak a ni. Mahse, a dinhmuna ding player hi lakluh kan tum rih lo. Enge thleng mek a, Manchester United player a la ni em tih pawh ka hre lo. Hetiang buainaah hian kan inrawlh ve lo a ni. Naupang te te chungchang sawi zui hi kan hna a ni lo," tiin a sawi thung.
