Manchester United leh Everton legend Wayne Rooney leh a nupui Coleen te chuan mipa naupang li an nei a, heng an fate hian football leh infiamna khawvelah hmabak an nei ṭan mek a ni. Old Trafford-a match 253 ngawt khung tawhtu leh United chanchina goal khung hnem ber Wayne-a fate hi an pa hniakhnung zui tumin ṭan an la hle a, mahse an pa chuan mi dang ngaiha 'Wayne Rooney-a fapa' ti chauhva hriat ni lovin, anmahni ngeiin mimal hming leh chanchin mawi tak an siam chhuah an duh pui hle a ni.

An unau zinga upa ber Kai Rooney hi kum 2021/22 season khan Manchester United tana a khelhnaah goal 56 khungin assist vawi 28 lai a nei a. A tirah Man City academy-ah a awm hman a, a pa-in DC United a enkawl lai khan US-ah pawh a khel hman bawk a, mahse kum 11 a nihin United hi a zawm leh a ni. January thla khan Old Trafford-ah FA Youth Cup-ah Derby 2-1 a an hneh ṭum khan U18 team tan a khel ṭan a, kumin nipui hian scholarship contract a ziak fel ta bawk. Kai hian head coach Michael Carrick-a senior team-ah luh chhoh ngei a tum tlat a ni.

Disney+ docuseries 'The Real Rooneys'-ah Wayne chuan, "Kai hian a ma chanchin leh hming mawi siam a duh a, kei chu a thlawp zeltu atan ka awm ang. Ka fapa a nih vang chauha scholarship emaw contract emaw hmu turin ka duh lo. Ama theihna ngei hmanga a thlen hi ka duh ber a ni," tiin a lo sawi tawh a ni.

An unau zinga pahnihna Klay Rooney (kum 13) pawh United youth set-up-ah a awm mek bawk a. Kum 2025 khan Spain-a Girona khuaa MICFootball tournament-ah United U12 team aiawhin a inlan a, he inelnaah hian UE Quart te an hmachhawn a ni. Kum 8 a nih aṭangin United naupang team nen hian ram danga tournament hrang hrang khel turin a feh chhuak tawh a ni.

A pathumna Kit Rooney (kum 10) erawh chuan football khelh chu chawlhsanin darts lam a luhchilh ta zawk a. Coleen chuan a fapa hian darts player professional nih a tum ber thu a sawi a ni. January 2025-a kum 9 a tlin champha pawh darts design hmangin an lawm nghe nghe a. Kit hian Alexandra Palace-ah World Championship la thartu Luke Littler pawh a lo inhmuhpui tawh bawk.

An unau zinga naupang ber kum 8 mi Cass Rooney erawh Everton academy aṭangin chhuah zalen (release) a ni thung. Coleen chuan Therapy Crouch podcast-ah sawiin, Everton mi leh sa nghet tak an fapa naupang ber tana thuthlung duhawm lo tak hrilh chu a harsa a tih thu a sawi a ni.

Coleen chuan, "Cass hi Everton ṭantu vur mai a ni a, season ticket te neiin club hi a atchilh em em a ni. U9 team-a an kaisang ṭan tawh avangin an squad thin a ngai a, a chhuak zinga a tel chu hrilh a harsa hle. Ka hrilh tirh chuan minute thum vel chu rilru na takin a ṭap bawrh bawrh a, mahse darkar khat hnuah chuan a theihnghilh leh mai a. A pi leh pute phone-in 'Everton-in min chhuah a ni' tiin awlsam takin a hrilh leh nghal mai a ni," tiin a sawi. Tunah hian Cass hi grassroots team-ah a la khel chhunzawm zel a ni.