Vawiin tlai hian Manchester United Women chuan Liverpool Women an hmachhawn dawn a, he match pawimawh tak hma hian United manager Eva Olid chuan chanchinbumite hmaah an inbuatsaih dan leh team dinhmun a sawifiah. Red Devils hian inelna hrang hrangah a zawnin match thum hnehna an chang tawh a, Nilaini liam ta khan Players' Cup-ah khualmualah Durham chu 5-1 ngawtin an va sawp a ni.
He match hma hian hliam thar nei an awm loh thu Olid-i'n a sawi a. "Vanneihthlak takin, hun rei tak chawl tur hliam nei mek te tih loh chu midang zawng chu an ṭha vek a ni. A bak zawng chu an ngai reng. Tun kar chu kan buai hle a, Nilainiah kan khel a, Inrinniah kan khel leh nghal dawn a, inbuatsaihna hun kan nei tam lo hle. Manager ka nihna angin chawlhkar puitling inbuatsaihna hun neih ngei kha ka thlang zawk ṭhin," tiin a sawi.
WSL schedule tawt tak chungchang sawi chhunzawm zelin, "Manager kan nihna angin ṭha taka inbuatsaih te, player-te hnenah chanchin kimchang pek te leh thil thleng thei hrang hrang laka inrin lawk te kan duh ṭhin a, mahse a chang chuan chutiang ti tur chuan hun kan nei tawk ṭhin lo. Kan insiamrem thiam a ngai a ni. Pathiannia khelh tur a nih chuan ni khat chauh pawh khan nasa takin min pui a, mahse Inrinni a nih chuan inbuatsaihna hun a tawt zual a, chuti chung chuan kan insiamrem a ngai tho a ni," a ti bawk.
Nilaini zana Durham laka an chak ṭum khan United rawltharte an che ṭha hle a, academy player paruk ngawt khelmualah an inlan hman a ni. Hemi chungchangah hian Olid-i'n, "Thil lawmawm tak a ni a, match kan khar lai khan khelmualah player naupang paruk lai kan kawl a, an khel ṭha em em bawk. Mahse, khelmuala minute tlemte chan chauh hi a tawk lo. An hmasawn zelna turin mimal ruahmanna leh mimal training session-te neihpui chhunzawm zel a, hna thawhho reng a ngai a ni," a ti.
Tun hnaiah England squad thar puanah an midfielder pawimawh Ella Toone koh tel a ni lo a, hei hian sawi a hlawh hle. Olid-i'n, "Ramtana koh ziah ṭhin, koh tak lohva an awm huna an rilru tur chu in hriatthiam ka ring. Tlang takin kan inbe tawh a. Manager ka nihna angin ka tih hmasak ber tur chu player-te'n an kiangah ka awm reng a, ka thlawp tlat a ni tih hriattir hi a ni. An thuzawnte pawh kan ngaihthlak sak a ngai bawk. Player ṭha ber a nih theih nan kan thawkdun chhunzawm zel dawn a, hei hi player dang zawng zawng lakah pawh ka tih tur a ni," tiin a sawifiah.
Spanish coach Olid-i hi kar tlemte liam ta chhunga an hmasawnnaah hlim hle mah se, tun season-a an goal hmasaber chu clean sheet neih a nih thu a sawi lang bawk. An hmachhawn tur Liverpool chungchang a sawi laiin, season liam taa an chet chhiat hnu pawha an manager chunga rinawmna pholangtu Liverpool thuneitute thutlukna chu a fak hle a ni.
Liverpool hlauhawmna lai a sawi chhuak a, "An che kual hneh hle a, tlarhmaah hmun nghet bik an nei lo. Player hrang hrangte hi khelmual hmun hrang hrangah an tlan kual thei a, hetiang team laka tlarhnung venhim hi a awlsam ngai lo. An chet zung zung theihna hi kan hria a, chuvang chuan kan inpeih thlap a ngai a ni," tiin a sawi.
