Manchester United goalkeeper Phallon Tullis-Joyce-i chuan vawiina Liverpool nena match pawimawh tak an khelh hmain club media a hmachhawn a, a hmabak leh club-a a hun hman tawh dante a sawi chhuak.

He American goalkeeper hian United-ah hian tun season hi a kum li na (fourth year) a ni tawh tih hriattir a nih khan mak a tih thu a sawi hial a ni. United-a a hun hman tawh chungchang sawiin, Tullis-Joyce-i chuan, "E khai, kum li lai a lo ni tawh tih ka lo hre miah lo! Player dangte nena kan thuzin (journey) thlir let hi a hlu em em a ni. Ka tana thil hlu ber chu he kawnga player tam tak ka tawng hi a ni a, mi ropui tak tak leh staff ṭha tak tak ka tawng bawk a ni," tiin a sawi.

United tana a hun hman tawh zinga a hriat reng tur ber pakhat chu nikum (last year) a Champions League-a Allianz Arena-ah Bayern Munich an hmachhawn ṭum kha a nih thu a sawi chhuak bawk a ni.

Tullis-Joyce-i hian manager thar Eva Olid-i'n goalkeeper-te laka a thil beisei pawh a sawi lang a. "Eva-i hian bul a rawn ṭan chak khawp mai. Heta min hruailuttu Mark Skinner-a chungah pawh lawmthu sawi ka duh a, a lakah zahna sang tak ka nei a, kan hun hman dun tawhte kha a hlu hle a ni. Eva-i a lo luh hnu hian a khelh dan phung leh goalkeeper-te laka a thil phutte chu lo zir thiam (absorb) vek ka tum a ni. Goal lo ven (shot-stopper) bakah, cross lo dang tur leh khelmuala thununna nei thei (dominant presence) ni turin min duh a ni," tiin a sawi.

Olid-i hian khelmuala thununna neih mai bakah, kea ball khawih kawngah pawh rintlak nih a phut hle a. Tullis-Joyce-i chuan, "Kea ball kan khawih lai pawha thununna nei thei tlat tur leh, tlarhnung vengtute ṭha taka be pawpa hmun awla awm player-te zawng chhuak thei turin min duh a ni," tiin a sawi belh.

Vawiin tlai dar 1:30 (BST)-a Liverpool nena an inkhelh tur chungchang sawiin, "Reds (Liverpool) hmachhawn hi chu a boruak a sang ṭhin hle a, a bikin he tun season li chhung hian chu chu ka lo tawng ve tawh a ni. Liverpool nena kan inkhel hi chu match lian tak a ni ziah a, ka nghakhlel hle a ni. Pre-season-ah khan kan lo inhmachhawn tawh a, tun season-ah erawh phuba lak ngei kan tum dawn a ni," tiin a sawi.

United States of America (USA) aiawha ram tana a khelh tur chungchangah pawh phur takin, "Ram tana koh ka nih apiang hian ka tan chawimawina lian tak a ni ziah. Friendly match-ah Spain vawi hnih kan hmachhawn dawn a, hei hi qualifier kan hmachhawn hmaa kan tana inbuatsaihna ṭha tak tur a ni," a ti. United locker room chungchang sawiin, "International break a hnuhnung ber a nih tawh chuan kan locker room hi a ruak vek ṭhin, a chhan chu theihna sang tak nei star player kan ngah em em a ni," tiin a sawi zui bawk a ni.