Inrinni-a Chelsea laka 2-0 a an tlawm tak avanga inelna hrang hrangah a zawnin match pakua (9) chhung winless (chak nei miah lo) an nih tak hnu pawhin, Thawhleh zan Champions League match-a Manchester United-in Roma an mikhual turah head coach Michael Carrick chuan team hi enkawl chhunzawm zel a inbeisei.

Stamford Bridge-a inkhelah khan thil thleng ngai bawk a thleng leh a. First half chhungin United hi inkhel thunun zawk leh che ṭha zawk ni engang mah se, chance an neihte an bawhpelh a, Morgan Rogers-a'n Chelsea goal hmahruai a khung hnuah an inkhelh dan phung a buai zui ta a ni. He goal chhuahnaa mawhphurhna nei Lisandro Martinez chu penalty a tihtliah avangin red card pek a ni zui a, he penalty hi Cole Palmer chuan goal-ah a chantir zui ta a ni.

Sky Sports-in a tarlan danin, inelna hrang hranga a zawnin match 9 chhung chak nei miah lova United an awm hi September 1984 hnua an record chhe ber a ni. Chu mai bakah, tun season chhunga khualmual match (away game) pasarih an khelh tawhah vawikhat mah an la chak lo a, hei hi 1973-74 season—an relegation season hnua an vawikhat thlenna a ni bawk.

Kar liam taa mahni mual Old Trafford-ah Bournemouth 3-0 a an sawp hnu khan Carrick hi ban mai tawh tura ngaihna a lian hle a, mahse club thuneitute chuan a laka rinna nghatin an thlawp zui a ni. TNT Sports-in Roma an hmachhawn turah team enkawl chhunzawm a inbeisei em tih an zawhna chu tawitein, "Beisei e," tiin a chhang.

Match zawha chanchinbumite nena an inbiaknaah chawlhkar laia match pawimawh an hmachhawn tur chungchang sawiin Carrick chuan, "Chawlhkar laia match hmachhawn tur hian naupangte hi inpeih taka siam ka nghakhlel hle a ni," a ti.

Premier League table chhuat lama intawhhnawh chungchang an zawhnaah, "Hetiang zawng pawh hian a thlir theih a. Mahse match i chak a nih chuan league schedule-ah rual deuhva i chho zung zung thei bawk a ni. Hetiang zawng hian thil a thlir tur a ni zawk," tiin Carrick-a'n a chhang a ni.

The Guardian-in a tarlan danin Carrick chuan, "Tuna ka thu sawi zawng zawng hian engmah a thlak danglam dawn lo. Thil a danglam phah dawn chuang lo a ni. Hmalam kan pan a, match kan chak a ngai a ni, chu zawng chu a ni mai," a ti bawk.

Carrick hian a defender Lisandro Martinez chu a mawhphurhna a hmehbel bik lo va. He thil thleng hi vawikhat mah a en let loh thu sawiin, Argentine defender hian a ti thlawn em tih an zawhna chu "Thlawn lo ve" tiin a chhang. Heti a nih rual hian red card leh goal pahnihna an chhuah tak chu "match-a thil thleng pawimawh tak" a nih thu a sawi bawk.

Match a tawp hnuah khualmual lama zui tu fan-te chuan Carrick-a hming a zawnin an au chhunzawm char char a, Carrick pawhin a fan-te hi a fak hle a ni. "Kan fan-te hi an ropui takzet a ni. Anni tan hian hawina tur kawng ṭha tak kan siamsak ngei a ngai a ni," a ti bawk.

Sky Sports-in chanchinbu hrang hrang aṭanga a lakkhawm danin, The Athletic chuan United head coach Carrick hian a dinhmun chhete tal a siamṭha thei a nih mial nan match pahnih tal chu mualah a chhawr leh rualin hun pek a ni dawn niin a tarlang.

Hei hian Old Trafford-a Roma an mikhual tur leh Pathiannia Aston Villa an mikhual turah Carrick-a hmabak a pawimawh zia a tilang chiang hle a. Bournemouth laka an tlawm hnu aṭang khan a dinhmun hian mi tam tak ngaihdan a luah tawh a, thla thar match inhmachhawn turah hian hlawhtlinna a chang a nih chauh an laka pressure awm mek hi a ziaawm beisei a ni.