Tun kar chhung zawng khan inkhelh hma thlengin Manchester United captain Bruno Fernandes chu sawi hlawh ber a ni a. Como laka an tlawm hnu khan Fernandes hi a lungawi lohna pholangin a ṭawng chhuak a, chu chuan head coach Michael Carrick-a chu hma la tura a nawr phah ta a ni. Fernandes-a thusawi kha United a hmangaih em avang leh club a ngaihtuah vang a nih rualin, a sawi chhuah dan erawh a fuh tawk lo hle a, hrem a phu reng bawk a ni. Bournemouth laka an tlawm ṭum khan Carrick-a'n bul a ṭantir loh bakah substitute pawha a luhtir duh loh khan thu neihna a kengkawh chiang hle. Mahse, Carrington-ah inbiakfiahna ṭha tak an neih hnuah, Thawhlehni khan Carrick chuan he buaina hi tihtawp a, theihnghilh a hun tawh thu tarlangin a titawp ta a ni.
A hma kar khan captaincy hlihsak a nih dawn em tih chungchanga zawhnate chu kalsan mah se, Ningani press conference-ah erawh he attacking midfielder hi an la ngaihhlut zia Carrick hian a pholang thung. Stamford Bridge-a inkhelh hmain MUTV hnenah Carrick chuan, "Bruno hi player ropui a ni a, a tawnhriat neih aṭang hian team tan thil tam tak a thehchhuak a ni. Helaiah hian hun harsa tam tak a lo paltlang tawh a, thil tam tak a lo hlawhtling tawh bawk a, team tana a thil thehchhuah theih chu a lo pholang tawh ṭhin a ni. Chuvangin kan tan chuan team-a mi pawimawh tak a ni a, vawiinah pawh hian balance ṭha tak kan neiin ka hria. Team ṭha tak kan nei a, kan naute pawhin inkhelh an nghakhlel hle a ni," tiin a sawi.
Bournemouth laka khelmuala a inlan ve loh khan Fernandes-a induhtawkna chu tina deuh mah se, bench-a a ṭhutna khan a ṭha zawngin amahah nghawng a nei zawk hlauh niin a lang. Chelsea laka an inhmachhawn ṭum khan, first half chhungin he skipper hian a mize hlui ṭha tak kha a rawn pholang leh a. Inkhelh ṭan tirh phat aṭangin, kum tam tak chhung United tana player pawimawh lo ni tawh ṭhin Fernandes kha hmuh tur a awm leh tawh a ni. Tlarhnung venhim kawngah a ṭang em em a, khingpuite umzuiin ball a chhuhsak zung zung a, a teammates-te tana hna harsa leh rim zawng zawng pawh a thawk vek a ni.
Hmalam nawr kawngah phei chuan a che ṭha lehzual a. Counter attack an neih ṭumin Bryan Mbeumo-a ball pass ṭha lutuk aṭang khan goal a khung teuh hle a. Hemi hnu hian Fernandes chuan cross mawi zet rawn siamin Mbeumo hian awlsam taka lo pet luh theihna remchang nei mah se, ball kal dan a chhiar sual avangin a hlah hlauh thung. Fernandes hian hun rei tak chhung a lo tih tawh loh, inkhel boruak thunun theihna a rawn pholang leh a; hetiang Fernandes hi chu thlahthlam theih miah loh chi a ni.
Second half bul an ṭan chhiat hnuah pawh, Fernandes-a free-kick pet ṭha zet chu Matheus Cunha chuan goal zawnah a lo chhuih lut zo ta lo a ni. Lisandro Martinez-a'n mawl taka red card a hmuh tak avangin Fernandes-a tan inkhel thlak danglam theihna chance a tlem phah hle a, mahse captain pakhat laka beisei ang senior performance ropui tak erawh a pholang thlap a ni.
'Manchester is Red' podcast lamah pawh Fernandes hian khelmual chhung ngeiah ngaihdam dilna a phochhuah a ngaih thu sawi a lo ni tawh a. Inrinni khan result chu United lakah kal tluang lo mah se, he Portuguese star hian khelmualah a theihna zawng zawng a thehchhuak chiang hle. Michael Carrick hian Manchester United manager a nihna a chhanhim dawn a nih chuan, Fernandes hi a theihna sang berah a awm reng a ngai a, Inrinni inkhel kha chu hmasawnna kawnga rahbi dik tak an rap a ni tih a chiang hle a ni.
