Manchester United chuan an tlarhma (attack) buaina chinfel nana January transfer window inhawng turah Monaco striker, Arsenal player hlui Folarin Balogun chu lakluh theihna hun ṭha chhawpchhuah a ni nia tarlan a ni.

United-in he striker chhawr theihna hun ṭha an hmuh mek lai hian, Italian club lian Juventus pawhin United aiawm hian he American forward hi lakluh tumin an ngaihven takzet bawk a ni.

Season liam ta chawhnu lamah Michael Carrick-a'n Old Trafford a thlen aṭang khan Manchester United striker-te chuan goal khung leh chet velah theihna sang tak an phochhuak a, goal pawh an khung hnem hle a ni. Mahse, tun season-ah erawh Old Trafford club hian tlarhma lamah goal khung harsatna lian tak an hmachhawn mek a, season liam taa an zia ṭha tak leh hlauhawm tak kha hmuh tur a awm tawh meuh lo a ni.

Head coach Michael Carrick leh United hotute chuan January transfer inhawng turah hian tlarhma thuam chak nan striker lakluh ngei an rilruk mek a. Hemi hriain Balogun-a aiawhtute chuan Monaco aṭanga he forward chhuak thei dinhmuna awm hi Manchester United hnenah lalut tura chhawpchhuakin inbiakna neihpui an inpeih thu an hriattir ta a ni.

Kum 23 mi, US international Folarin Balogun hi Arsenal academy chhuak niin, Ligue 1-a Reims-a loan-a a khelh lai khan goal 21 ngawt khungin a rawn inlan ṭha hle a. Hemi hnu hian French club Monaco chuan a nghetin an lalut ta a ni. Monaco tan pawh hian box chhung a chet vel leh goal khung theihna hmangin player pawimawh a ni zui zel a ni.

Mahse United tan hian he transfer hi a awlsam vek dawn lo a, Serie A club lian Juventus pawhin an tlarhma chak tawk lo hre rengin Balogun hi an ngaihven zui char char bawk. January transfer window a inhawng hnai tawh a, United hian Balogun lakluhna tur hian hma an la zui tak tak dawn nge, Juventus zawk hian inremna an neihpui zawk dawn tih chu thla thar lamah hian a chiang chho tawh ang.