Thawhlehnia Champions League-a Manchester United an tlawh hmain, Roma chuan Udine mualah hnehna ropui tak changin Serie A-ah tlawm nei lovin an la kal tluang zel a. Mahse player pawimawh eng emaw zat hliam vanga an chhawr theih loh bakah inkhelh zawn lutuk vanga an hah meuh chu, chak hmu zo lo United leh manager Michael Carrick-a tana vanneihna remchang la awmchhun a ni thei a, he inkhel hian Carrick-a hmabak a hril thui hle maithei a ni.
Gian Piero Gasperini-a naute hian October ni 31 khan Serie A matchday 10 khel turin Bluenergy Stadium an pan a, inkhel bul ṭan tir aṭangin an thunun nghal hle. Minute 10-na lekah captain Bryan Cristante chuan Wesley-a ball cross chu tauh lutin hma a hruaipui a. Hemi hnu minute 31-naah Cristante bawk hian Rodrigo Mora chu pet goal turin ball a siamsak leh a ni. Minute 33-naah Donyell Malen chuan a thun belh leh a, minute 37-naah Evan Ndicka chuan goal li-na a khung zui leh bawk.
Second half-ah Udinese lamin Nicolò Zaniolo (minute 50) leh Palma (minute 78) te hmangin goal hnih an rawn thun ve a, mahse hun tawp dawn injury time minute 92-naah Daniele Ghilardi chuan Roma tan goal ngana a rawn thun belh ta a ni.
Inkhelh zawhah Gasperini chuan 4-0 a hma an hruai hnuah an rilru a sawntlak deuh thu sawiin, ni thum hnu leka Manchester-a match an khelh leh nghal dawn vang a nih thu a sawi a. Ni 20 chhung leka an match pariatna a nih thu leh, United an hmachhawn tur ngaihtuah ran chungin squad pawh a inthlak kual nual thu a sawi bawk.
Roma hian chawn na nei Paulo Dybala leh kutzungpui ti na goalkeeper Mile Svilar te tel lovin Udine hi an pan a. Chung bakah Manu Koné leh Lorenzo Pellegrini te pawhin an malpui tha (hamstring) ti hliamin an inlan thei lo bawk. Heng player pawimawhte awm loh leh game khelh zawn lutuk hi United tan chuan beiseina thar siamtu ber a ni.
Chutih rual erawh chuan Roma hi tlarhma lamah an la hlauhawm thawkhat hle a. Kumin season chhung zawng khan inelna hrang hrangah October ni 14-a Real Madrid laka mahni muala 4-3 a an tlawm bak kha tlawm an la nei lo. Chumi hnu ni ruk lekah Bratislava-ah Slovan Bratislava chu 4-0 in an sawp zui a ni.
Cristante chuan chak an duh vanga tlawm tum lova rawn bei let tur United chu hmusit emaw ngaihnep emaw an tum miah loh thu a sawi a, Champions League dinhmun ṭha an luah theih nan Old Trafford-a result ṭha neih chu a pawimawh takzet tih a tarlang.
United lam dinhmun erawh a duhawm lo hle a. Stamford Bridge-a an tlawm zui tak khan September 1984 hnua chak loh an neih zawn rei ber record a siampui a ni. Second half-ah an tlarhnung a buai zo a, Lisandro Martinez hnawhchhuah a nih bakah Cole Palmer-a'n penalty a pet goal a, Morgan Rogers-a'n ama mimal theihna hmangin goal a thun bawk.
Hei hian Roma tlarhma hlauhawm hmachhawn turin United tlarhnung a ti pachhe hle a. Champions League league phase-ah point khat chiahin club pahnihte hi an inthlau bawk nen, knockout stage luh tumna kawngah he match hi a pawimawh em em dawn a ni. TNT Sports-in Carrick-a hnenah Roma an hmachhawn hunah a la enkawl dawn em tih an zawhna chu, United manager hian "Aw" tiin a chhang a, midweek match atan a player-te buatsaih a inpeih thu a sawi bawk. He match hi Thawhlehni zan dar 8 (UK time) ah Old Trafford-ah an khel dawn a ni.
