Munich-a Manchesterplatz memorial-a 1958-a thlawhtheihna chhiatrupna thlenga boralte hriatrengna hmuna thil hlu dahna darthlalang bawm chu rukru-te'n an chhu keh a, heta awm medal-te leh crystal sculpture an ru bo ta a ni. He thil thleng avang hian Manchester United chuan a siamṭhatna man zawng zawng pek an inhuam thu an sawi a, mual enkawltu Bayern supporters group 'Red Docs Munich' te pawhin darthlalang chhia chu kha mi ni ngei khan an lo thlak nghal bawk a ni.

Trudering district-a Manchesterplatz-ah he chhiatna hmun hriatrengna hi a awm a. Manchester Munich Memorial Foundation chuan tun kar tir lam khan he darthlalang bawm tihchhiat a nih thu leh thil hlu awmte lak bo a nih thu hriain, pawi an tih thu an thuchhuahah an tarlang a ni.

Munich Police-te chuan darthlalang bawm hi lung emaw concrete block hmanga chhuah keh nia an rin thu an tarlang a. Foundation chairman Ifty Ahmed-a chuan medal bo zat tak hi a la chian loh thu a sawi bawk.

Red Docs Munich chairman Mark Salzmann-a sawi danin, ruk chhuah zinga crystal sculpture pakhat hi Munich mayor hlui Dieter Reiter-a hnena pekah a lo ni tawh a ni. Salzmann-a nu chuan he hriatrengna hmun hi lirtheia a tlan pelh laia darthlalang chhia hi hmuin, Bayern fan-te pawh an che chhuak nghal vat a, zan a aliam hmain darthlalang thar an vuah fel nghal a ni. Ahmed-a chuan chak taka hma an lakna chungah he supporters group-te hi lawmthu a hrilh a ni.

Ahmed-a tan erawh he thil thleng hi darthlalang chhia lek piah lam a ni a, mi hrang hrang leh chhungte tan rilru natna lian tak a thlen a ni. A ngaihdanah chuan he mi ti-tute hian chhungte leh mi tam tak tana rilru natna an thlen zia an hrethiam lo a ni. United legend Nobby Stiles-a fapa pawhin he rukruk thil hi vantlang hmaah mawhphurhna nei lo tak a nih thu sawiin a dem hle a ni.

Manchester United chuan Manchesterplatz hi chhiatrupna thlenna mual tak tak hmuna an ngai a ni. Kum 1958 February ni 6 khan Belgrade-a European Cup match an khelh zawha in lama an haw lam hian thlawhtheihna hi fuel thun turin Munich-ah a chawlh a, he chhiatrupnaah hian mihring 23 an boral a, chung zingah chuan United player pariat (8) an tel a ni.

Manchesterplatz-a lungphun hi kum 2004 khan phun a ni a, a darthlalang bawm erawh kum 2020-ah dah niin, kum 2023 khan thuchhuah nemnghetin hawn a ni. Kum tin he hriatrengna hmunah hian leh Old Trafford-ah fan sang tam tak an pungkhawm ṭhin a ni. February 2026-a kum 68-na hriatrengna inkhawmah khan United ṭantu 1,500 chuang an pungkhawm a, hemi ṭum hian United director of fan engagement Rick McGagh leh goalkeeper hlui Alex Stepney te pawh an tel a ni.

Darthlalang vuah thar chu a awlsam na a, ruk bo tawh thil hlu thlak leh erawh thil harsa tak a ni dawn a ni. Red Docs Munich leh Foundation-te chuan heng thil bo thlaktu tur zawng turin thawhdan tur an ngaihtuah mek bawk a ni.