Real Betis-a loan-a a awm laia a chet ṭhat em avangin, Spanish club lamin sum lamah harsatna an nei chung pawhin Brazil winger Antony chuan Real Betis zawm nghet hi a phut lui tlat a ni.

Manchester United chuan an player hi hralh chhuak ta mah se, hmakhua thlirin sell-on clause pawimawh tak an zep tel a, nakina club danga an hralh leh a nih chuan a man aṭangin hlawkna lak ve ngei an tum a ni. Tunah chuan he thutlukna hi United tan inremna fing tak leh hlawk tak a rawn ni chho ṭan mek a, kum 26 mi Antony hi Betis-ah a khel ṭha chho hle.

Manager Manuel Pellegrini chuan Betis a zawm aṭangin club dinhmun a tiṭha chho hle a, tun season-ah pawh inelna hrang hrangah Betis an che zia a pui hle a ni. League leh Europe inelnaah Betis an che ṭha hle a, an hlawhtlinna hi vanneihthlak lutuka thleng mai a ni lo tih an phawrh chhuak a, Antony hi an team-a mi pawimawh berte zinga mi a ni.

Brazil international hi Pellegrini-a squad-ah chuan chhawr ber a ni a, game tam zawkah minute 90 a khel tluan thak ṭhin. Real Betis hian inelna hrang hrang an hmachhawn chung pawhin Antony hi an match sheet-ah a hming a lang hmasa ber zel a ni.

An match hnuhnung berah, mahni mualah FC Porto 3-2 a an hneh ṭum khan Antony hi Isco dawtah khelmuala player che ṭha ber pahnihna atan thlan a ni a, goal khat siamsakin (assist) ṭha takin a inlan a ni. He hnehna avang hian Champions League matchday hnih hnuah Betis hian standings-ah Manchester United an khum mek a ni.

La Liga lamah erawh Antony hian goal leh assist a la nei em lo na a, a khelh dan phung erawh a ṭha hle thung. Pellegrini chuan tlarhnung ṭhiat darh tur leh a sir lam venhim nan a mi rinrawl ber atan a hmang ber zel a ni. Real Madrid leh Barcelona te an chungah awm mah se, Betis hi La Liga standings-ah pathumnaah an awm mek a, he club pahnihte aia sang zawka awm a harsa em avangin pathumna dinhmun hi dinhmun ṭha ber anga ngaih theih a ni.

Heng thil thleng zawng zawng hian Manchester United tan beiseina ṭha tak a lantir a ni. Antony hi Betis-ah hlim takin a awm mek a, mahse Europe-a club lian zawkten an rawn ngaihven a, a career puitling zawka chhunzawmna hun ṭha an rawn pe a nih chuan a rilru a pen mai pawh a rinawm a ni.

Spain-ah hian a form, a hmingṭhatna leh a inrintawkna te a siamṭha leh tawh a, mahse "club liana hlawhtling lo" tih a hming bawk hi phelh a chak em em dawn a ni. Chu vang chuan Betis-a a form a chiang tawh a nih chuan club lian dang zawm theihna dinhmun ṭha bera a ding dawn a ni.

Hemi hmunah hian Manchester United an rawn lang ve leh dawn a ni. Real Betis hian United aiin man to zawkin hralh an tum dawn a, chumi a nih chuan inremnaa a ziah angin United hian a man transfer fee aṭangin zaa 50 (nearly 50%) vel ngawt an dawng haw leh dawn tihna a ni.

Hei hi Betis-in tlawm taka Antony an lakluh theih nana an pawm duh tak kha a ni a, mahse Betis hotute pawhin Antony-a rawn che ṭha leh thut hi an beisei lawk lutuk bik kher lo ang.

Antony-a a form a ṭhat zel chuan mi zawng zawng atan hlawkna a ni dawn. Tun dinhmunah chuan nakkum nipui bazarah emaw a kum lehah emaw United tana sum tam tak rawn tun luttu tur a ni chho mek a ni.