Khelmual chhungah chuan hmelma lian ni ṭhin mah se, Steven Gerrard leh Roy Keane te chuan Atletico Madrid laka Man United an tlawm hnua Lisandro Martinez-a thusawi rapthlak tak chungchangah ngaihdan inang tak an nei a ni. He Argentina defender hian team tana ṭangkai lo thil a sawi chhuak niin an ngai dun a, chutih rualin player dangte anga khawl (robot) ang maia thil sawi ve mai lo va, a ngaihdan tlang tak a phawrh chhuak erawh an hriatthiampui ve tho a ni.

Liverpool midfielder hlui Gerrard chuan Martinez-a thil sawi chu "thil ṭangkai lo tak" a nih thu a sawi a, Arsenal forward hlui Ian Wright pawhin he Argentina international hian hetiang ṭawngkam a phuhchhuah chhan hi a hre thiam lo hle. Club lamin transfer bazar hmanga chinfel theihna hun remchang an neih tawh loh laia Martinez-a'n hetiang thil a sawi chhuak chu mak a tih thu sawiin, United fan-ten a thusawi an thlawp chhan erawh a hriatthiam thu a sawi bawk.

'Stick to Football' podcast episode tharah Roy Keane chuan, "Player pakhatin a sawi tur leh sawi loh tur hrilh tur hian tunge kan nih bik? A dik nge a dik lo tih lam ka sawi lo, mahse hei hi player-ten an tih ṭhin dan chu a ni alawm. Match zawhah TV-ah emaw, social media-ah emaw an ti tho ang. Eng nge an sawi theih a, an sawi theih loh tih chu tute nge hrilh thei ang? Fan ṭhenkhat chuan ṭha an ti ang a, ṭhenkhat erawh chuan 'team i tichhe mek a ni' an ti bawk ang,

"A bikin theihna sang ber la pholang thei lo leh team buai lai tak phei chuan a harsa lehzual. Amah ngei pawh hian game 80 [inelna hrang hrangah match 115] chauh a la khel a ni. Hlawkna a neih ka hre lo, mahse chutih rualin player pakhatin a rilru phurrit phawrh chhuah a duh a nih chuan, player-te chu ti thei lo tura dan theih an ni lo. Tunlaia player-te hi chuan TV-a an sawi loh pawhin, kawng dang hmangin, social media emaw an agent-te kaltlangin an ti tho tho ang," tiin Keane chuan a sawi.

Mahse Gary Neville chuan lo pawtchatin, "Mahse Roy, hei chu club tan chuan chhiatna lian tak a ni. Nangmah hi manager ni ta la, Michael Carrick-a dinhmunah ding ta la, board leh sporting director te bei chiam tu player i kawl a nih chuan hei hi buaina lian tak a ni.

"Kum 2010 khan Wayne Rooney chuan club chu player ṭha lakluh kawngah beiseina sang tawk lo tiin thuchhuah a lo siam tawh a. Ka ngaihdan chuan kha thil kha a khelhpui teammate-te theihna tawk lo anga tlang taka sawiselna a ni, player thar lakluh belh a ngai tih a sawi miau avangin. Chuvangin Lisandro Martinez-a'n hetiang thil a sawi hi player thlirna aṭang chuan buaina lian tak a tling a ni. Khatih lai khan keini leh Giggsy chuan zingah Wazza (Rooney) kha kan be nghal a, player zawng zawng hnenah ngaihdam dilin mipui hmaah pawh ngaihdam a dil a nih kha. Dressing room-ah khan, 'Eng vangin nge kan tawk loh? League title la thei turin min ring tawk lo em ni?' tiin kan zawt a ni.

"Tunah Martinez-a'n club chu player thar la lut turin beiseina a nei sang tawk lo a ti a. Hei hi i club-a player awmsate laka beihna tlang tak a ni. Player thar tam zawk lalut tur an ni tih a sawi hian a teammate-te a bei nghal a ni. Tukinah hian player ni ve ta ila, Bruno Fernandes, Harry Maguire emaw senior player dangte dinhmunah ding ta ila, a chungah hian ka thinrim ngawt ang. A awmzia chu kan zinga ṭhenkhat chu hetah awm tlak lo kan nih thu leh, player dang lakluh a ngaih thu a sawina tluk a ni," a ti bawk.

Neville chuan sporting director kher player-in tlang taka an sawisel a la hriat ngai loh thu a sawi belh a. Gerrard pawhin squad chhunga senior player-ten he thil hi an sawiho ngei a rin thu sawiin, Leeds United hmachhawn tur inbuatsaihna kawngah Carrick tan a pawi hle tih a sawi.

Keane chuan, "Chiang takin club dinhmun hi a buai nuaih a, circus ang mai a ni ta," a ti a. Gerrard chuan sawi belhin, "Kei pawhin Roy-a sawi hi ka pawmpui. Player pakhatin interview a neihin khawl ang maia a ṭawng chuan kan ning a, an dik tawk lo kan ti ṭhin. A thil sawiah a tlang em em chu ka chhuang a, kawng lehlamah chuan Michael Carrick-a hum a tumna lamah thil a tikhawlo ta zawk a ni. He thil hi chu a ruka sawi chi a ni a, hetiang rilru hi a pu tak tak a nih chuan Jason Wilcox emaw Jim Ratcliffe emaw hmu se, an bulah a rilru chu phawrh mai tur a ni," a ti.

Keane chuan chhangin, "United-a hun harsa i tawh meka i tih hmasak ber tur chu, darthlalangah inbih hmasak a ni. Heng player-te hian an theihna sang ber an pholang em? Match engemaw zatah in chak loh chuan squad a chak tawk lo tiin in sawi maithei, mahse in tlawm hnu leh in buai lai tak a ni a. He thil hi Man United tana game 80 chauh khel lahin a sawi a ni a, game zathum, zali emaw zanga pawh a la khel tling lo. Chuvang chuan darthlalangah inbih la, nangmah ngei khan khel ṭha hmasa rawh ka ti nawn leh a ni," a ti.

Ian Wright chuan Martinez-a thil sawi chhanah hian chhan dang thuk zawk a awm a rin thu sawiin, contract thar a duh vang nge Old Trafford chhuahsan a duh vang tih hriat a har thu a sawi bawk a ni.