Manchester United defender Lisandro Martinez chuan club hotute a sawisel hnuah, Old Trafford-a a hma hun chu a chiang lo ta hle a, club chhuahsan a hnaih chho viau niin chanchinbu mite chuan an tarlang.
Kum 28 mi Argentina defender hian United-ah hian a contract kum hnuhnung ber a hmang mek a, club lam hian June 2028 thleng thla 12 danga pawhsei theihna (option) nei mah se, The Athletic tarlan danin Martinez hian a hun pawtsei a duh tawh lo a, club lam pawhin he option hman hi an hreh ve tho bawk a ni. A chhuak a nih chuan Spain ram pan chu a duhthusam ber a ni ang.
Club a zawm tirh kuma World Cup a chawi aṭang khan hlawh tam zawk nen contract thar ziah hi Martinez hian a lo beisei tawh ṭhin a, mahse inbiakna erawh a kal tluang thei ngai meuh lo. Thawhleh zan Champions League match-ah Atletico Madrid laka 2-0 a an tlawm hnu khan, match hnu lama interview vawi hnih a neihah he Argentine defender hian United chu thiltum lian nei lo tiin a puh a, club director of football Jason Wilcox te chu a kap zui hial a ni.
Prime Video hnena a sawinaah Martinez chuan, "Kan khel chhe takzet a ni, chhe tak a ni. Keimah pawh ka inthunun hram hram a ngai hial a ni. Mahse a chang chuan hei hi tun dinhmuna kan club nihna dik tak tarlangtu darthlalang a ni ṭhin. Season liam ta khan season ṭha tak kan hmang a, mahse tunah chuan a sang ber nihna aṭangin kan hla tawh hle. Inelna sang hmachhawn tur chuan player kan lak belh a ngai a ni. Atletico khi en ula, team ropui tak an nei a, chak pawh an phu a ni.
"Mitin hnen aṭangin beiseina sang zawk ka nei a ni. Sum thehchhuah belh (investment) maw? Aw, zaa za (100%) in a ngai. Kan technical director hnen aṭang pawh hian a aia ṭha ka beisei, he thil hi tlang takin ka sawi a ngai a ni," tiin a sawi.
Martinez chuan sawi zawmin, "Player-te kan nih angin a aia tam kan tih a ngai a, mahse hetiang zan khirh hmachhawn tur hian squad chak ṭha tak din a pawimawh bawk a ni. Season liam ta khan team ropui tak din theihna tur bulṭanna kan nei a, mahse thudik sawi a ngai. Ka team nena heta lo kal a, result ṭha tak neih tum miah lo anga kan lang hi a thinrimthlak hle a ni," a ti.
Kumin nipui chhung khan United head coach Michael Carrick chu squad thuam chak nan thlawpna ṭha tawk pek a ni em tih an zawhna chu chhangin Martinez chuan, "Chutiangin ka ngai lo," a ti a. "Ani chuan theih tawp a chhuah a, mahse season tin a inang lo. Team dangte chuan i khelh dan phung leh thil kimchang zawng zawng an hre vek tawh a. Season tin i inthlak danglam lo a nih chuan buaina lian tak a ni. Manager inthlak reng mai maw? A hmun dangte hi engtin nge ni ve thung ang? Thil tam tak ka sawi thei lo. Coach puh mai a awlsam a, player puh pawh a awlsam, mahse hmun dangte hi engtin nge ni ve thung le?" tiin thuneitute a sawisel zui bawk a ni.
Martinez hian CBS Sports nena an inbiaknaah pawh a thusawite hi a nemnghet nawn leh a. Amah hnaihtute chuan Martinez hian a contract-ah kum nga la nei pawh nise hetiang tho hi a sawi an rin thu The Athletic an hrilh a, club aṭanga chhuah luih nana hetianga ṭawng chhuak a nih loh thu an sawi bawk.
Hemi hnu Nilai zan khan Instagram lamah a thusawi vanga boruak awm chu tihdaih tumin thuchhuah a siam leh a. Match zawha an duh ang result an neih loh vanga thinrim leh rilru hah avanga sawi chhuak a nih thu sawiin, football chu chak duhna leh phurna sang tak nena a khelh ṭhin thu leh, Manchester United tana inelna sang ber hmachhawn a duh vanga beiseina sang tak nei a nih thu a tarlang zui leh ta a ni.
