Manchester United player-te chu training-ah an kir leh tawh a, Atletico Madrid laka an tlawm hnua an club enkawltu Jason Wilcox leh hotu dangte a sawisel hrep avangin Lisandro Martinez hian hremna a tawk dawn em tih chu a hriat thuai dawn a ni.
Martinez hian nipui transfer bazar chhunga United-in sum an thehchhuah tlem lutuk avanga a lungawi lohna chu Atletico laka an tlawm hnu khan a phawrhchhuak vak a. Fan-te rilru awmdan a sawichhuak a nih rualin, Nilaini zan khan boruak tihdaih tumin social media-ah thuchhuah a siam a, mahse nghawng erawh a la nei zui zel tho a rinawm.
Instagram-a a thuziakah Martinez chuan, "Nimin lama ka thu sawi chungchangah khan ka ngaihdan leh ka rilru awmdan tarlan ka duh a ni. Match zawh khan kan duh ang result kan hmuh loh avangin thinrim leh beidawng tak chungin ka ṭawng chhuak a nih kha. Football ka nunpui dan hrechiangtute chuan chak duhna, inpekna leh phurna nasa tak ka neih zia an hria ang.
"Thil a kal tluan loh hian a na duh em em a, a bikin Manchester United ang club ropui leh chanchin ngah aiawh phei chuan a na lehzual a ni. Ka thu sawiah khan he club hian nomawi lian a inchuh theih nan ka duhzia a lang a, chutiang dinhmun sang chu ka football thlir dan leh he jersey hak hian mawhphurhna a ken tel a ni.
"Thil tam zawk kan mamawh ka tih khan, he club-a awm zawng zawngte hian thiltum sang kan neih a ngai tih ka sawina a ni. Theihna sang bera inel thei tur chuan kan mamawh engkim kan neih a ngai a, hei hi keimah aṭanga ṭanin kan vawn nun tlat tur a ni bawk. Keini player-te hian mawhphurhna kan la hmasa ber tur a ni a, chu mawhphurhnaah chuan ka inhung hmasa ber bawk. United chu a chungnung ber nihna dinhmuna hlankai leh turin kan ṭanrual a ngai a ni. Ka team-mate te, manager leh club tana thawktute zawng zawng hi ka ring a, he badge tan hian ka neih zawng zawng ka hlan zel ang," tiin a tarlang.
Martinez hian player-ten mawhphurhna an lak hmasak a ngaih thu sawiin inbengdaih a tum ve deuh na a, mahse a thuchhuahah hian ngaihdam dilna vawikhat mah a lang lo thung. Match zawh hlim boruak rit tak karah ṭawng chhuak mah se, a thusawiah a la ding nghet tih a chiang hle a ni.
Ngaihdam a dil loh hian engtiangin nge a hremna tawk turah nghawng a neih dawn tih hriat a la ni lo a, United thudawnnate chuan thutlukna a chian hma chu ngawih an chuh rih a, mahse sum chawitir (fine) tal chu a hmachhawn a rinawm a ni. Martinez-a thil sawi hian United dressing room chhungril a nuam lo hle tih a tarlang a. Player ṭhenkhatin a sawi dan phung duh lo mah se, squad-a hmun ruak phuhruk a nih loh vanga an beidawnna chu a dik zia hretu an tam hle.
Atletico Madrid laka an inkhelh ṭum khan tlarhma lailiah winger an chhawr a ngai a, left-back-ah centre-back chhawr a ngai bawk. Hei hi nipui bazarah position pawimawh pahnih an hlamchhiah vang a ni. Luke Shaw chu season liam ta khan Premier League match zawng zawng khel mah se kar khata match hnih khelh ziah chu a taksain a tlin dawn lo tih a chiang sa a, striker Benjamin Sesko hliam avanga pre-season a hmaih laiin striker dang lak luh an nei bawk si lo.
August thla khan Harry Maguire leh Shaw te pawhin squad thuamchak a ngaih zia an lo sawi tawh a nih kha. Martinez hian nakkum June thla hian contract a hmang zo tawh dawn a, hetianga a chet chhan hi club chhuahsan a tum vang hmasaber nia ngai an awm bawk. Mahse Wilcox-a'n first team aṭanga hnawhchhuah duh mah se, tlarhnungah player indaih lohna nasa tak an nei a; Maguire leh Matthijs de Ligt te hliam neih ngun laiin Leny Yoro leh Ayden Heaven te chu an la naupang lutuk a, manager Michael Carrick tan pawh hetiang thutlukna siam chu thil theih a ni lo.
Head coach Carrick-a chungchang Martinez-a'n a sawinaah, "Theihtawp a chhuah a ni. Mahse season tin hi a inang lo. Season liam taa i tih dan kha i sawi reng thei lo, team dangten i khelh dan an hre vek tawh a, inthlak danglam loh chuan season tharah buaina lian a tling ṭhin," tiin a lo sawi tawh a, United chhungril buaina hian chinfel a la hlawh lo hle a ni.
