Manchester United zawm tura sawizawm mek Brazil international Endrick chuan Nilaini zan Champions League match-ah bench aṭanga rawn lutin, goal a khung bakah player of the match atan thlan a ni hial a. He Brazilian rawlthar hian Real Madrid chu Roma laka 3-1 a an hnufual hnuah 4-3 a an letleh theih nan tha hnem tak thawhin, manager Jose Mourinho hnenah player pawimawh tak a nih theih zia a pholang nawn leh ta a ni.
He inkhel hmuhnawm takah hian Italian club Roma chuan Marten de Roon-a goal hmangin hma an hruai zet a, chawlhlawk hmain Kylian Mbappe chuan Real Madrid tan an siphurh a rawn sut a. Mahse second half inṭan hlimah Roma tan Donyell Malen chuan a zawnin goal hnih a rawn thun zui a, 3-1 in Roma hian inkhel an thunun ta mai emaw tih a ni hman a ni.
Mahse Mourinho-a'n bench aṭanga a rawn luhtir substitute pahnih Carlos Espi leh Endrick te chuan goal khat ve ve rawn thunin 3-3 in an rawn chhawk zangkhai a, a tawpah minute 90-naah Antonio Rudiger chuan hnai te aṭangin chakna goal mawi lutuk a khung ta hlauh a ni. Khelmualah minute 30 chauh awm hman mah se, UEFA chuan Endrick hi Player of the Match atan an thlang zui bawk.
Tun kar tir lam khan Spain aṭanga report chhuakah, Ruben Amorim-a enkawl AC Milan khumin Manchester United chuan he rawlthar hi lakluh theih an inbeisei thu tarlan a ni a. Borussia Dortmund pawhin he Brazilian hi an lo ngaihven tawh bawk a ni. Kum 2024 khan Endrick hian Palmeiras aṭangin Los Blancos hi kum ruk daih contract ziakin a zawm a, August thlaa a debut match-ah goal khung nghal mah se, season liam ta December thla khan Lyon lamah loan-in a chhuak zawk a nih kha.
Tun season-ah hliam tenau a tawrh avangin vawi hnih chauh a la inlan a. Mahse amah aiawhtu RocNation-a Football hotu Alan Redmond chuan Endrick-a hmabak chu Bernabeu-ah a awm zawk niin a sawi tlat thung. Redmond chuan, "Sum leh pai lam hi a pawimawh ber lo a, player hian club project a thlir zawk a ni. Real Madrid-a awm phu theihna nei player a ni a, hunṭha a mamawh mai chauh a ni. Lyon-a loan-a a awm lai khan a khel ṭha em em a, hemi hnu hian harsatna tlem a nei a ni. Madrid-a cham zel hi a rilruk ber a ni a, hmun dangah a chhuah ka ring lo," tiin a sawi.
Real Madrid boss Jose Mourinho pawhin Endrick hi hralh emaw loan-a chhuahtir emaw a tum loh thu a nemnghet ve bawk. Thawhlehni khan TNT Sports Brazil hnenah Mourinho chuan, "Amah ngaihventu club dangte kha chu theihnghilh rawh u. Ka player ngainat em em leh theihna sang tak nei a ni a, kan squad tan hian a pawimawh takzet a ni," a ti.
"Villarreal laka kan khelh ṭum khan luhtir ka tum lai mekin goal kan khung a, player pakhat hnawhchhuah kan nih tak bawk si avangin coach tan chuan ruahmanna dang siam a ngai ta a ni. Amah lak tum tu pawh an awm a nih chuan keimah nen an inbeih fe a ngai ang; heta ṭanga loan-a chhuah a ngaihna ka hre lo va, hetah hian hlawhtlinna lian tak a chang ngei dawn a ni," tiin Mourinho chuan a sawi zui bawk a ni.
