Sir Jim Ratcliffe leh a company Ineos-ten Manchester United siamṭhat leh tura hma an lakna kawng hi a hautak hle mai. Kum 73 mi British billionaire hian kum 2024-a United neitu zinga a tel ve aṭang khan sawiselna nasa tak a tawk chho nghal a ni. Glazer chhungkaw kuta kum tam tak chhung club a lo tlakchhiat hnuah, Red Devils-te dinhmun ngai awhtir leh tura thutlukna khauh tak tak a siamte chuan mipui lawm a hlawh lo fo bawk.
Matchday ticket leh season ticket man tihpun te, club hnathawk tam tak ban (staff-cutting) te chu Ineos-in Old Trafford-a football enkawlna hna an chelh hnua thutlukna harsa tak an siamte zinga mi a ni a. Hetiang dinhmun karah hian Manchester United captain hlui Gary Neville chuan a nun puma a lo atchilh tawh club enkawl hna chu kuta lak a duh miah loh thu a sawichhuak a, hei hian Ratcliffe-a leh a thawhpuite hmachhawn mek mawhphurhna a san zia a pholang chiang hle a ni.
Kum 2011-a United tana a khelh tawp hnuah, kum 51 mi Neville hian football chhung leh pawnah hlawhtlinna lian tak a chang chho a. Sky Sports pundit langsar ber zinga mi a nih bakah, Manchester khawpuiah ram leh in (property) sumdawnna lian tak a din nghe nghe. The Athletic FC podcast-a a inlan ṭumin, a naupan laia a lo ṭan em em Manchester United hi la enkawl ve a duh em tih an zawt a, a chhanna chuan he hna hautak zia hi a tarlang hle.
Neville chuan heti hian a sawi: "Tunah hian ka awmhmunah hian ka ṭha tawk viauin ka hria. Kum 51 ka ni ve tawh a. Ka tana ka nunna a ni a, ka chhungkua tih lohvah chuan United hi ka nun pum tibuai a, nghawng lian ber neitu a ni. Hla thu ka ngainat em em pakhatah chuan 'naupangte kan nih laia kan mumangte kha puitling kan nih hian a bo ṭhin' tih a awm a. United hian naupang ang maiin min la siam a, suangtuahna min neih tir reng a ni. I chhunga naupang rilru kha a bo tur a ni lo a, United hian chu chu ka tan min la vawn sakin min la pe reng a ni," tiin a sawi.
A naupan tet aṭanga United nunpui a, hmangaihtu Neville meuhvin he club enkawl hna khawih a duh miah lo hian Sir Jim Ratcliffe leh Ineos-te kuta mawhphurhna awm hi namai a ni lo tih a tilang chiang hle. League Two club Salford City-a co-owner a nih laia manager a ban fo avanga mipui sawiselna a lo tawh tawhte chuan club lian enkawl a buaithlak zia a hriatthiamtir tawh hrim hrim bawk a ni.
Old Trafford-ah hian thil ṭha an tih chang chuan Ratcliffe-a hian fan-te fakna a dawng ve bawk a, 2025 nipui transfer bazar laia player lakluh danah pawh lawm a hlawh hle a nih kha. Mahse, United anga club lianah chuan boruak a inthlak chak em em a, hlawhtlinna vawi khat an neihin buaina vawi hnih a rawn thleng zut ṭhin a ni ber mai. Michael Carrick-a hnuaia 2026-27 season an ṭan dan a mumal chiah loh avangin, Ratcliffe leh Ineos-te hian club siamṭha tur hian dawhtheihna lian tak an neih a la ngai dawn a ni.
