Manchester United midfielder rawlthar kum 20 mi Jack Moorhouse chu Scottish Premiership club Dundee FC-a loan-a a khelh mek laiin a khup hliam (ACL) na tak a tawk a, enkawl tura Old Trafford-ah hruai kir a nih tak thu tarlan a ni. International break chhung khan he rawlthar hian a khup hi a ti hliam a, kumin season chhung zawng a inkhelh chhunzawm theih tawh loh phah maithei a ni.

Dundee chanchinbu langsar The Courier Sport-in a tarlan danin, Moorhouse-a'n hliam na tak a tawn tak avang hian a club pui Manchester United lamah thawn kir a ni ta a. Dundee FC tan phei chuan Moorhouse hi tun season chhunga a zawn a a khup (ACL) ti hliam player pathumna a ni ta hial a ni. Mipui leh infiammi zinga ACL hliam tawk thei percentage hi 0.43% chauh a nih laiin, squad khata player pathum ngawtin hetiang hliam an tawk ta mai hi vanduai thlak tak leh rin aia thil thleng harsa tak a ni.

Kum 20 mi Moorhouse tan hian a football career hi a tluang purh bik lo hle a. A hma aṭang tawhin hliam chawp chi hrang hrang lakah harsatna lo tawk tawhin, Manchester United academy-ah pawh hmasawnna hmun a chan hnem tur ang a chan theih loh phah nual a ni. Mahse, kum 2024 aṭang khan a theihna phochhuakin hma a rawn sawn chho hle thung.

Manager hlui Ruben Amorim pawhin he midfielder rawlthar theihna hi a ngaihven em em a, senior team tana debut pe chiah lo mah se, first-team training session-ah erawh inlanna hunṭha vawi hnem tak a lo pe tawh a ni.

Tun season inṭan tirh aṭang khan Moorhouse hi Dundee FC-ah loan-a intah hriam turin an thawn a, bul pawh a ṭan ṭha viau nghe nghe. Scottish Premiership-ah hian match tlem te chauh a la khel na a, a theihna sang tak phochhuahin a khel ṭha hle a ni. A bikin international break hma lawka Motherwell an hneh ṭum khan mualneitu tan che ṭha ber berte zinga mi niin, tlar lailiah a thawhhlawk hle a nih kha.

Mahse, he a hliam thar avang hian an ruahmanna leh beiseina zawng zawng a thiah phah tak meuh a ni. A ACL hliam hi a nasat dan zirin, tualzawla a rawn kir leh hmain hun rei tak inenkawl a ngai dawn a, tun season atan phei chuan a hmabak a tawp a ni ber maithei. A hma pawhin hliam aṭangin a lo kir leh tawh ṭhin tak na a, hetiang hliam lian leh pawi lutuk erawh dinhmun dang daih a ni thung.

Moorhouse hi khelmuala tlan chak, che zangkhai leh ball kenga awlsam taka tlan tlang thei chi a nih avangin, he hliam aṭanga a rawn dam chhuah hnua a khelh dan tur leh, a hun zelah nghawng pawi tak a neih zui zel erawh United leh Dundee hotute tana thil ngaihtuahawm tak a tling a ni.