Manchester City-in financial rule 115 ngawt an bawhchhia nia hmuhchhuah a nih hnuah, Manchester United chuan an elpui lian City-in dan an bawhchhiat vang hian sum leh pai lamah engtiang chiahin nge an tawrh ve tih chhungril lamah an chhui zui mek nia tarlan a ni.

Premier League club Manchester City hian thil tihsual engmah an neih loh thu sawiin, independent commission-in thutlukna a siam lakah hian appeal thehlut turin an inbuatsaih mek a. Hemi hnu hian ESPN reporter Mark Ogden chuan Paul Scholes leh Nicky Butt te nena 'The Good, The Bad & The Football' podcast-a an inbiaknaah, City-in dan an bawhchhiat chhung khan Manchester United hian sum leh pai lamah nghawng thalo tak tak an lo tawk tawh tih a sawi chhuak a ni.

Ogden-a tarlan danin, entirna langsar tak pakhat chu kum 2016-a Champions League khel tur an tling lo kha a ni. 2015-16 season khan Louis van Gaal-a hnuaia khel Red Devils te chu pangana (5th) an ni a, 2016-17 Champions League khelhna hmun an chang ta lo a ni. Kha season khan United leh Man City te chu Premier League point hmuh zat a inang a, mahse goal difference-ah City zawkin palina (4th) dinhmun luahin Champions League an tling ta zawk a ni.

Hemi avang hian United chuan an sum dawn tur zawng zawngah hluphut lian tak an tawk nghal a. Kum 2014-a Adidas nena kum 10 chhung daih tur £750m man thuthlung an ziahah khan, a zawnin kum hnih Champions League an tling lo a nih chuan an sum hmuh tur zaa 30 (30 per cent)-a tihhniam a ni ang tih a tel a. Champions League an tlin loh avang hian an sum hmuh tur zat aṭang hian £30m aia tam an chan nghal der a ni.

Ogden chuan heng thu hi sawiin, "Legal action lak chungchangah chuan, United-in kha kum (2016)-a Champions League an tlin loh chungchang kha in sawi a. An ngaihdanah chuan khami avang khan £30m aṭanga £40m vel an hloh hiau a ni. Adidas nena an inremna piah lamah, Champions League an khelh loh avangin matchday revenue aṭang pawhin £10m vel an hloh bawk," tiin a sawi.

Ogden chuan sawi zui lehin, "A chung ber aṭangin, club lian tak tak heng zozai hian sum tam tak an hloh thu an sawi ang. Kha hun chhung khan club pakhat zela £200m vel zetzawt hloh anga sawite pawh ka hria. Chu bakah player-ten title bonus an hloh tawhte pawh chhiar tel nise, player-te pawhin an phut ve ngei a rinawm a ni," tiin a sawi zawm bawk.

Champions League an tlin tak loh avang hian Louis van Gaal chu kum 2016 khan manager hna aṭangin ban a ni ta a. A thlaktu Jose Mourinho chuan 2016-17 season-ah United chu hruaiin, Premier League-ah rukna (6th) chauh ni mah se, 2017-a Europa League nomawi an chawi tak avangin Champions League-ah an kir leh ta nge nge a ni.