Manchester United chuan transfer bazar liam ta khan an tlar laili (midfield) thuam ṭhat tumin player thar eng emaw zat la lut mah se, khelmuala an chet dan erawh beisei a la phak lo hle.
Brighton aṭanga an lak thar Carlos Baleba chu hliam avangin a la chawl mek a, mahse October ni 10-a Tottenham Hotspur an hmachhawn hunah chuan Red Devils tan hian a vawikhat nan a inlan theih an beisei a ni. Aston Villa aṭanga an lak Youri Tielemans pawh United-ah bul ṭan ṭha tawk lo mah se zawi zawiin hma a sawn chho mek a, mahse Kobbie Mainoo nena an inkawp dan erawh zawhna siamtu a la ni reng a ni. Chelsea aṭanga an lak thar Andrey Santos pawh pre-season-ah che ṭha viau mah se a zuihral leh deuh rih bawk nen, league title vawi 20 la tawh United hian tlar lailia an formula ṭha ber tur an la zawng chhuak thei meuh lo a ni.
Chutiang boruak karah chuan, TEAMtalk thuchhuah chuan United hian an engine room thuam chak an tumna chu an la tawp mai lo niin a tarlang a. INEOS chuan Italian club Como tana an midfielder pawimawh Lucas Da Cunha chungchangah inbiakna an nei ṭan nia report a ni.
Kum 25 mi Frenchman hi Lombardy a thlen tirh khan winger emaw attacking midfielder anga chhawr tlangpui a ni ṭhin a, mahse an coach Cesc Fabregas-a'n deep-lying playmaker ni turin a zirtir puitling chho a, khelmual lailia inkhel thununtu pawimawh takah a chhuah ta a ni.
Da Cunha-a theihna hi a thang chak em em a, France national team manager thar Zinedine Zidane-a hnuaiah ram tan a vawikhat nan koh niin, Thawhṭannia Belgium laka an chak ṭum khan bul a ṭan nghal hial a ni. He rawlthar theihna pholang zualtu chu Como-in kum nga daih contract thar an ziahpui hialna hi a ni. Mahse chuti chung chuan club dangte ngaihvenna a reh chuang lo a, Premier League club lian Chelsea phei chu he player lak tum mekah hian dinhmun ṭha bera ding nia sawi an ni.
TEAMtalk chuan tarlangin, "France tana a chet ṭhat hnuah Como midfielder Lucas Da Cunha chu Chelsea mit fuknaah a rawn lang thar leh a, mahse ram tana a inlan hma daih aṭang tawh khan kum 25 mi hi an lo ngaihven tawh zawk a ni. Zinedine Zidane-a'n France squad a thlan hmasak berah Da Cunha hi beisei loh taka koh a ni a, Como star hian Thawhṭannia Belgium an hneh ṭum khan bul a ṭan zui bawk. He Frenchman hming hi Europe khawmualpuiah a lian chho hle a, ram tana a luh hma pawh khan Premier League club ṭhenkhat chuan a hmasawnna hi an lo thlithlai tawh reng a ni," tiin an ziak.
Thudawnnaten an nemngheh danin Chelsea leh Manchester United bakah Aston Villa, Newcastle United leh Brighton te pawhin Da Cunha-a chungchangah hian biakna an lo nei tawh bawk a ni. Heng bakah hian Serie A club dangte pawhin ngaihvenin Atalanta, Napoli leh Roma te pawhin he French midfielder hi an thlithlai reng bawk. Mahse, head coach Michael Carrick-a mamawh hmasak ber chu tlar hnung (defence) leh tlar hma (attack) lam thuam chak a nih rih avangin, INEOS hian he Frenchman lakluh nan hian sum tam tak an thehchhuak nghal mai dawn em tih erawh hriat a la ni lo.
