Kar khat liam ta khan, he international break chhung hian Bruno Fernandes-a chu fimkhur taka enkawl a, chawlh hahdam tir tura ngaih a ni a. Portugal coach Jorge Jesus-a'n "buaina khirh tak" a neih thu a sawi hnuah, Wales nena an inkhelh hmasak berah kum 32 mi Fernandes hi lakchhuah hma a ni a. United tana a khelh lai pawhin na tuar chunga khelmual a rah ṭhin thu Jesus hian a lo tarlang tawh bawk a ni.

Champions League-a Sabah an hneh ṭum khan Fernandes hian hliam a tawk a, kar thum chhung ram tana inkhelh chawlh a nih hmaa Premier League-a Manchester City leh Fulham an hmachhawn ṭum pawh khan bul a ṭan theih nan fitness test a neih hnuhnun a ngai hial a ni.

Nations League match li an khelh tura a pahnihna, Norway an hmachhawn ṭum khan Jesus chuan Fernandes chu hahchawlh tir a thlang a, hei hi Old Trafford lamin an lawm hle a. Mahse, United captain-in chawlh hahdamna hun ṭha a neih zui zel theihna beiseina chu Cristiano Ronaldo-a'n camp a chhuahsan thut avangin a thamral ta vek a ni.

Norway lakah Ronaldo hi chhawr lohvin bench-ah a ṭhu a, training a zawm loh hnuah national team camp chu chhuahsanin, Fernandes chuan captain armband a hreng zui ta a ni. Ningani zana Denmark laka an chak ṭum khan minute 90 a khel tluan thak a, zanin Pathiannia Porto-a Norway an hmachhawn lehna turah pawh hmun pawimawh tak a luah leh a ngai dawn a ni. Inkhelh hma press conference-ah Fernandes hi thu tlangzarh turin a inlan a, he hunah hian Portugal tana thil khirh tak ni bawk Ronaldo-a chungchang zawhna pawh a chhang a ni.

Chawlh hahdam a hnekin Fernandes-a mawhphurhna chu a rit zual sauh a. Club leh ram tan captain a ni chho mek a, Ningani khan Copenhagen-ah assist vawi hnih nei mah se, Portugal tan hian a thawkrim hle. Zanina Norway an hneh leh a nih chuan Portugal hian match li an khelhah vawi li hnehna an chang dawn a, Nations League finals luh theihna kawng an sial ṭha hle dawn a ni. Chuvangin Ronaldo awm lo mah se Fernandes hian khelmualah tha tam tak a sen leh a ngai dawn tihna a ni.

United lam erawh chuan Fernandes chu na nei lova a him pial theih nan an rilru a hah hle a. City leh Fulham a hmachhawn theih nana a dam chhoh dan khan Carrington-a staff ṭhenkhat chu mak a tihtir a, a la dam chiang lo tih a lang reng bawk a, kha match-ah pawh khan a khelh ṭhin dan pangngai a pha lo a ni.

Zanin inkhel hi hliam nei lova a paltlang thei a nih chuan, Inrinni-a Tottenham an hmachhawn hma chu kar khat deuhthaw chawlhna hun a nei dawn a ni. Hmachhawn tur match khirh tak tak a awm chhoh dawn avangin, head coach Michael Carrick chuan Fernandes hi a theihna sang ber nena damṭha taka a inlan a mamawh takzet a. United boss hian a captain chu international break-a a match hnuhnung ber aṭanga a him piala a rawn let theih nan a nghakhlel hle a ni.