Manchester United forward Marcus Rashford-a'n Old Trafford-a a kir leh hnua inkhelh a harsat chhoh mek laiin, head coach Michael Carrick chuan a goal khung loh chhawn hi a tihtawp vat a ring a, a thlawp zui zel dawn tih a tiam a ni.
Rashford hian khelmualah theih tawp chhuah bawk mah se, tun season-ah goal a la khung lova, assist pawh a la nei lo a ni. Chuti chung chuan Fulham nen an inkhelh zawhah Carrick chuan Rashford-a chet dan chu a ṭha a ti hle a, a goal khung hmabak chauh a nih thu a sawi bawk.
Carrick chuan, "Khelmualah hlauhawm tak a ni chho mek a, vawiinah pawh hian goal pahnih vel chu a khung thei a ni. Hmun ṭha tak takah a in-position a, mahse a kuta ball a rawn tlak fuh theih rih loh vang a ni. Mahse a rawn thleng ngei dawn a ni. Harsatna tenau a neih avangin lakchhuah a ngai a ni. Marcus-a mizia kan hria a, a theihna sang ber chher chhuah dan pawh kan hria a, chutiang chuan kan ti chhunzawm zel dawn a ni," tiin a sawi.
Fulham laka an inkhelh ṭumah hian Rashford hi khelmual chhunga goal hmaah che chhe pawlah a lang a, first half-ah pawh hnai te aṭangin hmun ṭha tak a bawhpelh a ni. Mahse tlarhma lamah a vir hle a, Fulham box chhungah ball vawi 10 ngawt a khawih a, hei hi United player zinga khawih hnem ber a ni. Chu mai bakah, vawi li chance a siam a, vawi 6 zet shot a nei bawk a ni.
Chuti chung chuan Fulham tlarhnungte tan hlauhawm lian tak a tling tak tak thei lova, tun kar tir lama Brighton nena an inkhelh ṭuma one-on-one a hlah tak ang chiah khan, a pawimawh laia goal khung hi a harsat tlat rih a ni.
United defender hlui Rio Ferdinand chuan Rashford-a khelhna hmun sawn kual a rawt a. Social media X-ah thu ziakin, Rashford hi tlarhma laili (centre-forward)-ah chhawr a, Matheus Cunha chu mual veilam (left wing)-ah dah chhin tura thutlukna siam a rawt a ni. "Marcus hi laili-ah chhawr ula, Cunha hi veilamah dah ula, centre-back-te ngaihtuah tur danglam deuh va pe ula a ṭha ang," tiin Ferdinand chuan a tarlang.
Striker Benjamin Sesko chu hliam avangin Fulham lakah a inlan thei lova, he hliam vang hian Carrick-a'n tlarhma siksawi dan tur a ngaihtuah a ngai a ni. Mahse Carrick hian Rashford hi laili-ah a chhawr chhin duh mai lo a. Cunha hian season liam ta khan veilam aṭangin United tan a che pawimawh hle a, Rashford-a position hi sawn ni se chuan United tan chakna thar a rawn thlen theih ngei beisei a ni.
