Tun thla chhung hian Manchester United chuan ram aiawha khel turin an youth player pasarih (7) ngawt ram hrang hrang squad-ah an chhuah tir a. Senior team-a la inlan thei rih lo mah se, hetiang hun remchang hi rawltharte tan khawvel huapa inelna lian hmachhawn a, player dangte nena inkawp dan zir chhoh nan hunṭha tak a ni.

Zirtawpni khan U20 Euro Elite League inelna bul ṭannaah England Under-20 chuan Italy Under-20 chu 3-1 in an hneh a. He inkhelah hian Manchester United player pathum ngawt head coach Darren Moore-a squad-ah an inlan a ni.

Inkhelh ṭan aṭanga reiloteah England tan Jesse Derry chuan half-time hma chiahin hmahruaina goal a khung a, hemi hnu hian Mikey Moore chuan goal hnihna a thun belh leh a ni. Italy lamin goal khat an rawn khung ve hman hnuah, bench aṭanga lut Manchester United academy chhuak Shea Lacey chuan goal mawi em em mai a rawn thun zui ta a ni.

Mual dinglam sir aṭanga ball changtu Lacey hian a hmaa defender chu a bum hnuah, a taksa insiamremin Italy goalkeeper ban phak loh turin ball a kawi luttir a, England tan hnehna a nemnghetsak ta a ni.

He inkhelah hian Lacey chu substitute aṭanga rawn inlan a nih laiin, United tlarhnung defender pahnih Ayden Heaven leh Harry Amass te erawh chuan bul an ṭan dun thung a, hei hi Darren Moore-a'n England U20 head coach a nih hnua a hnehna hmasaber a ni bawk.

Kum 19 mi Lacey hian tun season chhungin Manchester United senior team tan goal khat a khung tawh a, Michael Carrick-a hnuaia a vawikhat bul ṭannaah he goal hi a thun a ni. Italy team laka substitute aṭanga a rawn chet dan hian Carrington academy aṭangin player theihna sang tak an chher chhuak leh ta tih a pholang chiang hle.

Heaven leh Amass te pawhin ram tana game hunbi ṭha tak an nei hi United tan chanchin lawmawm a ni a, international break zawha hliam nei lova Carrington training ground an thlen leh theih chuan club tan thil hlawkthlak tak a tling chho zel ang.