The Athletic-in a tarlan danin, Premier League-in dan bawhchhiatna thubuai 115 a siamsak zinga 114-ah Manchester City chu thiam loh chantir an ni ta. Hremna (sanctions) erawh engtiang chiah nge a nih dawn tih la puanzar a ni rih lo a ni.
Manchester City hian he thutlukna lakah hian zualko (appeal) an thehluh ngei beisei a nih avangin thil kalphung hi a la rei deuh mai thei a, mahse dikna hlenchhuah a nih theih nana hmalauna pawimawh tak a ni tih a chiang hle.
City chunga hremna thehchhuah theih zingah hian zilhna (reprimand), pawisa tam tham tak chawitir, point paihsak, leh Premier League aṭanga hnuailam league-a paihthlak (relegation) te a tel thei tura ngaih a ni. He chanchin thar hi a darhzawh rualin Manchester United fan-te chuan phur takin an ngaihdan an sawi zui nasa hle a ni.
City-in thubuai 114 laia thiam loh an chan tak avang hian TalkingPoints app huang chhungah United fan-te chuan sawihona nasa tak an nei a, Red Devils ṭantute chu an lawm hle tih a hriat theih bawk. Premier League dar aṭangin phurrit lian tak lak kian a ni a, City lakah dan khauh tak leka hremna na tak pein, kum tam tak chhung dan bawhchhiaa an lo kal tawh ang hian tuma'n dan palzuh an tum nawn tawh lohna tura hma lak a ngai tawh dawn a ni.
He thil hi kumin football chanchina thu thang lian ber a tling hial a, City hian Premier League leh Europe khawmualpuiah hlawhtlinna an lo chan te kha dan dik lo hmanga an tih a nih avangin mi tam tak tan erawh thil mak a ni lem lo.
Fan pakhat chuan, "A tir aṭang reng khan THIAM LOH an chang sa tawh a ni. Hetiang em ema a rei hi thil atthlak tak a ni," tiin a sawichhuak a. City-in zualko an thehluh avanga hun a ngai rei leh dawn nia hlauthawng an awm bawk a, fan dang pakhat chuan, "Appeal an thehluh chuan a aia rei a la ngai leh ngei ang," tiin a tarlang.
Chu mai bakah, manager hlui Ole Gunnar Solskjaer-a'n dik lo taka a chan tak Premier League title kha pek let tura phut tawk an awm bawk a. United ṭantu pakhat chuan, "Kumin season-ah hian league title kan chawi dawn tih ka hria a ni – tun season title ka sawi lo a, league title pakhat tal a ni ka tih ni," tiin fiamthu titakin a sawi bawk a ni.
