Manchester United chuan an head coach Michael Carrick-a hnuaiah Premier League chanchina an season bul ṭan chhiat ber ṭum pakhat an hmachhawn mek a.

Match nga khelh tawhah point nga chauh hmuin, hei hi Premier League-a match nga khelh hnua point an hmuh tlem ber ṭum a ni a, Brighton & Hove Albion lakah tlawmin Carabao Cup aṭang pawhin an tla tawh bawk a ni. Khelmuala United player-te tlan tlem dan leh an ṭhahnemngaih tawk loh dan tarlangtu statistics hrang hrang a tam hle a, hei hian manager tana theihtawp an chhuah tawh lo nia ngaihtir thei mah se, chanchin thar lo chhuak chuan Red Devils player-te'n Carrick-a laka rilru an put dan dik tak a tarlang thung.

*The Sun-in* a tarlan danin, Michael Carrick hian Manchester United dressing room thlawpna a la hmu tlat a ni. Fulham laka an inkhelh ṭuma Kobbie Mainoo-a thlak a thutlukna siam avang khan United ṭantute chuan Carrick hi an lo au el (booed) tawh a, mahse player-te erawh chuan an manager hi an la thlawp tlat thung. Inelna hrang hrangah vawi hnih chauh hnehna an la chan avangin, player-te hian mimal takin United-in tun season bul an ṭan chhiatnaah hian mawhphurhna tam zawk chu an chungah a tla tih an pawm a ni. Dressing room-a thudawnna pakhat chuan, "Kan dinhmun hi kan siamṭha tur a ni," tiin a sawi a, an zinga inlungrualna a la awm ṭhat zia a tarlang.

Report-in a sawi belh danin, khualmual Goodison Park-a Everton nena an inhnehtawk kha United squad chuan hun remchang ṭha tak an bawhpelhah an ngai hle. A hma chiah karah Ipswich Town chu 5-2 in lo sawp tawh mah se, Everton lakah hian tlarhnung phili tak avangin minute 95-naah goal an chhuah a, point hnih lai an hloh phah ta a ni. He inkhelah hian hnehna chang zui thei nise chuan tun ai hian an dinhmun a ziaawm deuh tur a nih laiin, an chetsualna hian an boruak a tichhe zual hle a ni.

Hetiang a nih lai hian, Italy lama chanchinbu report-te chuan club thuneitute chuan United hruai tur hian Carrick hi a tling tawk em tih an rinhlelh ṭan thu an tarlang a. United hian Antonio Conte-a dinhmun ngaihvenin biakna hmasa an nei tawh nia sawi a ni. Napoli a chhuahsan hnua club nei lo he Italian manager hi United-in Carrick hi an ban a nih chuan a thlaktu tur atana rinkai ber a ni chho mek a ni. United hotute hian hma lak thuai an duh a nih chuan Conte hi an dawr hma ber tur a ni dawn a, mahse dressing room lamin Carrick an la thlawp tlat avang hian thutlukna siam erawh a la harsa rih maithei a ni.