Champions League-a Atletico Madrid laka an tlawm hnua defender Lisandro Martinez-a'n Manchester United hotute (hierarchy) vawmdawm taka a sawisel hnuah, Chelsea striker hlui Jimmy Floyd Hasselbaink chuan Argentine defender hi match rawn thleng turah chhawr lo turin United a chhuahchhal.

Kumin nipui bazarah khan United hian midfield thuam nan sum £155million zet sengin Carlos Baleba, Youri Tielemans leh Andrey Santos te an lalut a. Mahse, head coach Michael Carrick-a naute hian tlarhnung (defence) lamah erawh player thar an lalut meuh lo a ni. United hian Elliot Anderson leh Mateus Fernandes te lakluh tum eng ang mah se an man a to avangin an inhnukdawk a, tlarhnung veilam atana an target lian ber Lewis Hall pawh an chang lo bawk a ni.

Season liam ta khan pathumna ni mah se, United hian tun season bul ṭan dan an hman hlelh hle a, Premier League match vawi ruk an khelh tawhah vawi khat chiah hnehna an la chan meuh lo a ni. Martinez-a comments mak tak hian Pathiannia Leeds United nena an inkhelh turah a inlan dawn leh dawn loh a tichiang lo a, a contract hi season tawpah a zawh dawn tawh avangin Old Trafford-a a hma hun pawhin sawi a hlawh chho hle bawk.

Hasselbaink chuan Sky Sports hnenah sawiin, Martinez-a thil sawite chu a dik thovang, mahse mipui hmaa puangzar tur erawh a ni lo tiin a sawi. Hasselbaink chuan, "A thil tarlan hi a dik a ni maithei, mahse khatianga mipuite hmaa sawichhuah kha a dik em? Chu chu thil dang hlak a ni. A thil sawi erawh a dik thovang. Match dawtah emaw a hnihnaah pawh inkhelhtir loh tawp zawk tur a ni, hetiang thil hi tlang taka mipui hmaa puanchhuah miah loh tur a ni," tiin a sawi.

United lam aṭangin thuchhuah a la awm loh laiin, Martinez chuan a Instagram story-ah ziakin sawifiahna a siam zui a. "Nimin lama ka thusawi chungchanga chanchin hrang hrang chhuah mekah ka rilru awm dan tlem ziak hlek ka duh a ni. Match zawha ka ṭawng chhuah khan kan tlawm avanga ka thinrim leh beidawng thawk thut vang a ni. Football ka atchilh zia leh chak ka duh zia min hriatpui tu ten an hria ang. Manchester United tana inkhel chung si a thil a kal tluan loh hian min ti rethei hle ṭhin," a ti.

Martinez chuan sawi zawmin, "Ka ṭawngkam khan he club hi nomawi sang ber ber chawi tura ka duh zia a tilang a ni. He kawr ka sarin mawhphurhna a rawn thlen zawng zawng hi ka ngai pawimawh em em a. First and foremost-ah chuan keini player te ngei hian theihna thehchhuah kan mamawh a ni. Manager, team-mate te leh club kal zel tura thawk tute zawng zawng ka ring em em a ni," tiin a ziak a ni.

Atletico Madrid laka an tlawm hnu khan Martinez hian chanchinbumite hmaah a beidawk hle tih a lo zep lo a ni. "Season liam ta khan season ṭha tak kan hmang a, tunah chuan club hotute aṭangin thil tam tak kan beisei tawh a ni, player ṭha tam tak neih a ngai a ni. Atletico te khan team ṭha tak an nei a, chak pawh an phu a ni. Technical director [Jason Wilcox] lakah pawh duh ka nei sang hle. Player kan nih angin kan tih tur a tam a, mahse zan hetiang hmachhawn tur chuan squad chak tak neih a ngai a ni. Manager thlak chhen hian awmzia a nei lo, hmun dang pawh kan thlir a ngai a ni," a lo ti nghe nghe.