Thawhlehni zana Champions League inkhela Metropolitano Stadium-a Atletico Madrid laka 2-0 a Manchester United an tlawm hnu khan, Lisandro Martinez-a thu sawi chuan khelmual chhunga thil thleng aiin chanchinbu hmai a luah zawk a. Kum 28 mi Argentina defender hian nipui transfer laia United sum hman dan chungchangah club thuneitute chu na takin a bei a, director of football Jason Wilcox chu a ṭawngel hial a ni.
He inkhelah hian Atletico Madrid chuan United an nawr na hle a, Pablo Barrios chuan minute khatna lekah goal a thun nghal a, second half tawp lamah Ademola Lookman chuan an chakna goal a rawn thun belh bawk. He chak lohna avang hian head coach Michael Carrick-a lakah sawiselna a zual phah bawk a ni. 2022 World Cup champion Martinez hian a thusawi avanga buaina a chhuah hnuah, a thu sawi awmzia sawifiah nan social media lamah thuchhuah thui tak a siam leh nghe nghe a ni.
Manchester United captain hlui leh Sky Sports pundit Gary Neville chuan The Overlap podcast 'Stick to Football'-ah he thil hi sawiin, Martinez-a ṭawngkam hman chu United senior player Bruno Fernandes leh Harry Maguire te tan pawm har tak tur a nih thu a sawi chhuak.
Neville chuan, "Martinez khan player thar lakluh chungchanga club thiltum leh duhthusam a sawi a nih kha. Hei hi i khelhpui i ṭhiante tlang taka beihna a ni. Chuvangin, club-in player thar an la tlem lutuk tiha Martinez-a'n a sawi hian, a ṭhiante theihna a ring tawk lo tihna a tluk a ni.
"Vawiin zing khan player la ni ve ta ila, Bruno Fernandes leh Harry Maguire emaw senior player dangte dinhmunah khan ding ta ila, a chungah hian ka thinrim khawp ang. A chhan chu kan zinga ṭhenkhat hi helai hmuna awm tlak loh leh an aia ṭha player thar lakluh ngai hiala a ngaih vang a ni," tiin a sawi.
Kum 51 mi Neville chuan Martinez-a thil tih hi kum 2010-a Wayne Rooney-a'n Old Trafford chhuahsan a duh thu a lo puan chhuah dan nen a tehkhin bawk. Khatih hun lai khan Rooney pawhin club-in player thar lak kawngah thiltum lian an nei tawk lo tiin a lo sawi tawh a, khami ṭum khan amah leh Ryan Giggs chuan Rooney hi dressing room-ah an hmachhawn thu a sawi chhuak a ni.
Neville chuan, "Kum 2010 khan Wayne Rooney chuan club-in player lak kawngah hma an la ṭha tawk lo tiin thuchhuah a lo siam tawh a. Ka ngaihdan chuan chu chu a khelhpui ṭhiante sawiselna a ni a, player la awmsate chu ṭha tawk lo leh player dang lakluh ngai anga ngaihna a ni. Chuvang tak chuan player nihna aṭanga thlirin Lisandro Martinez-a thil sawi hi ka pawm thei lo a ni.
"Khatiang thil a thlen tuk zing khan Giggsy nen Wazza (Rooney) kha kan va be nghal a. 'Dressing room-a kan theihna hi a ṭha tawk lo em ni? League champion thei tur khawpin kan ṭha lo tihna em ni?' tiin kan zawt a, tichuan player zawng zawng hnenah leh mipui hmaah ngaihdam a dil leh ta a nih kha. Martinez-a'n a sawi tum pawh hi Rooney-a sawi ang chiah kha a niin ka hria," tiin a sawifiah a ni.
Manchester United hian tun kar Pathianni tlai dar 7:30 (IST) / chawhnu dar 2:00 (UK) hian Premier League lamah Elland Road-ah khualmual panin an hmelma Leeds United an hmachhawn leh dawn a ni.
