Carrington training ground-a nitina chengte chuan Manchester United tana Argentina defender Lisandro Martinez-a'n training a zawm leh zawm loh inthlauhzia an sawi fo ṭhin. Khelmual chhung leh pawnah inpekna sang tak neiin, thil ṭha tawk lo a hmuh chuan zep ṭit-ṭet lova sawichhuak mai ṭhin mi a nih avangin team-ah nghawng lian tak a nei reng a ni.

Mahse, kum 2022-a Ajax aṭanga a luh hnua United enkawltu full-time manager pathum—Erik ten Hag, Ruben Amorim leh Michael Carrick-a te tan chuan he defender hi chhawr ziah theih a ni lo thung. A khelh dan phung a tharum ngah leh a ṭul huna a tana nâ 'the butcher' an tih hial khawpa mi khauh a nih avang hian hliamin a tlakbuak zing hle a. Kum li chhungin Premier League match 152 khelh theih awmah game 65 chauh bul a ṭan hman a ni.

He kum 29 mi hian training session-ah boruak sâng leh inelna khauh tak a thlen ṭhin a, thil a kal dik lo a nih chuan mi hmachhawn a hreh ngai lo. Manager hrang hrangte'n a laka beiseina an neih san theih em emna chhan leh hetiang mize khauh a neih avanga an ngainat ṭhinna ngei mai chu, Thawhlehni zan Metropolitano-a inkhelh hnu khan Old Trafford hotute lam hawi zawngin a rawn puakchhuak ta a ni.

Martinez hian a career-a a theihna sang lai ber chu United tan a hlan a, mahse club-in hmasawnna tluantling an nei hlei thei lo chu a rilru a na takzet a ni. A ṭawngkam chhuakah pawh zep nei lovin, club thuneitute kaihhruaina leh hmalak dan chu a sawisel ta phawng mai a. A thusawiah hian squad chhungrila senior player tam tak pawhin an thlawp hle nia hriat a ni bawk.

He thil thleng hian Martinez-a hmabak a tithim lehzual thei bawk. Kum 2022-a kum nga daih contract a ziah kha a season hnuhnung berah a chuangkai mek a, United hian thla 12 dang pawtsei theihna (option) nei mah se, Martinez-a ṭawngkam na tak hian club hotute chu contract pawhsei lam ngaihtuah lo turin a nawr thei a ni. Player lam tan pawh nipui liam ta aṭang tawh khan a hma hun tur a lo ngaihtuah tawh bawk.

Kum 2022 khan Erik ten Hag chuan United squad-ah zirtirna pe a, huaisen taka inhmachhawn ngam hruaitu an mamawh tih hriain Casemiro leh Martinez te hi a lalut a nih kha. Martinez hian a mize puitling leh khauh tak chu pho lang chhunzawm reng mah se, hun a kal zel a, Old Trafford-a a hun a tawp dawn hnaih takah hian a rilrua awm dik tak chu zep hauh lovin club thuneitute hmaah a au chhuahpui ta a ni.