Manchester United manager Michael Carrick chuan an club enkawltu hlui David Moyes-a'n an ban hmaa thil a lo sawi tawh ang chiah chu sawi chhuak lehin, chanchin duhawm lo tak chu a thlen nawn loh hram a beisei hle ang. United boss hian tun season bul an ṭan chhe hle a, Atletico Madrid laka 2-0 a an tlawm chu an chetsualna hnuhnung ber a ni ta hial a ni.
Inelna hrang hrangah match kua an khelh tawh zinga vawi hnih chauh hnehna an la chang a, Premier League-ah 13-na dinhmun luahin Carabao Cup aṭang pawhin Brighton lakah an tla hma hle bawk. Hei hi season liam taa Carrick-a'n mawhphurhna a lak ṭan tirha match 17-ah vawi 12 ngawt hnehna changa Champions League khel tura pathumna dinhmun an lo luahpui theih dan nen chuan a inthlau hle a ni.
Kumin nipui bazar chhung khan inelna hrang hranga inlan thei tura inbuatsaihin midfielder pathum lai an lalut a, season liam taa pathumna an nihna aia sang thlen an tum a nih kha. Mahse tun dinhmunah chuan chu an thiltum chu an la phak lo hle a, chutiang karah kum 45 mi coach hian a hnathawh sawiselna nasa tak awm mek chu lawm taka a pawm thu a sawi tlat thung a ni.
Atletico an hmachhawn hmain Carrick chuan, "Hetiang hun, thil a kal tluang loh chang hian nuam ka ti ṭhin. Hetih hunah hian tu nge i kiangah ding a, group chhungah, player te, squad leh club chhungah tu nge awm tak tak a, he hmuna hun rei tak cham duh tak tak tu nge ni tih a hriat theih a ni," tiin a sawi. "Tu nge club tana inpe tak tak a, tu tan nge he thil hi a hlut takzet tih a lang chhuak ṭhin a ni.
"Fan-te an awm reng a, thil ṭha an beisei ngawih ngawih a, chutiang chu kan pek ngei an phu a ni. I thlen duhna hmun thleng tur chuan chona hi i hmachhawn thiam a ngai a. Tunah hian chumi lai takah chuan kan awm mek a, mahse kan paltlang ngei ang tih ka ring tlat a ni.
"Thil tam tak kan beisei a, beiseina sang tak kan nei a ni. Mahse hetiang dinhmuna kan din theih dan tur hi ka hre sa reng tho mai. Match tam tak kan lo chak tawh avangin, hun bumboh leh khirh deuh zawk kan tawn hun a awm dawn tih kha a hriat sa reng a ni," tiin a sawi bawk.
Carrick hian season bul an ṭan chhiatna chu a team-in an paltlang theih a ring tlat chung pawhin, United-a pressure awm nuam a tih thu a sawi hi Sir Alex Ferguson-a thlaktu David Moyes-a'n he dinhmun a chelh ṭan laia a lo sawi tawh nen a inang hle. Moyes khan opening match-ah Swansea City hnehin, Jose Mourinho-a Chelsea an hmachhawn hmain pressure a ngainat zia heti hian a lo sawi tawh a ni:
"David Moyes chu pressure hnuaiah a awm tih thu ka hre reng mai a, mahse hetianga kan khelh theih chhung chuan pawi ka ti lo reng reng. Pressure hnuaia awm hi ngaiah ka nei tawh zawk a ni," tiin August 2013 khan Moyes chuan a lo sawi tawh. "Ka mizia nena inmil tak a ni a, hetiang khawpa squad ṭha i kawl theih miau chuan pressure pangngai ang khan a hriat theih tawh meuh loh a ni. Mi zinga chak tura ngaih ber kan ni tawh kher lo mai thei, mahse tupawh kan ngam vek a ni tih kan pholang tawh a. Season ṭan tirh teah chuan hei aia tam hi phut theih a ni lo," a lo ti a nih kha.
Moyes-a'n beiseina sang tak lo nei mah se, thla riat hnu lekah kum 63 mi hi United chuan an ban ta tho a, 2013-14 campaign match li la awmah club legend Ryan Giggs chuan a enkawl zui ta a ni. Moyes-a hnuaiah khan Carrick hi squad-ah telin match 36 ngawt a khel hman a, a hnuah manager-a a hun hman chungchang chu a lo sawichhuak tawh a ni.
Kum 2017 khan Sky Sports hnenah Carrick chuan, "Thlir let chuan, khami season khan engmah a kal tluang ta lo a, a tawpah season ṭha kan nei ta lo a nih kha. David-a tan a pawi hle a, a hna a chan phah ta a, a tawp dan kha ka khawngaih hle mai, mahse chu chu football a ni tlat si a. Result ṭha i neih loh a, manager i nih bawk chuan a nghawng chu i tuar mai a ngai a ni," tiin a lo sawi tawh a ni.
Carrick hian Moyes-a tihsual tawh aṭanga inzir chungin club chet chhiatna hi siamṭhat thuai a beisei hle a. Pathianni hian Elland Road-ah Leeds United an hmachhawn dawn a, he inkhelah hian Carrick-a naute hian hnehna chan lehna hunṭha an nei ang.
