Champions League inkhelah Manchester United chuan Spain mual tlawhin Atletico Madrid an hmachhawn a, Michael Carrick-a naute hi Metropolitano Stadium-ah tlawmin khelmualah mi 10 chauhvin inkhel an khar a ni.
Inkhel ṭan phat aṭanga minute khatna lekah Pablo Barrios chuan Atletico tan goal a khung nghal a. Second half-ah Leny Yoro chu red card hmuin hnawhchhuah a nih hnuah, Ademola Lookman chuan Atletico tan goal hnihna a rawn thun belh a, La Liga club hian hnehna an chang ta a ni. He tlawmna hian United chu inelna hrang hrangah a zawnin match nga chhung chak nei lo dinhmunah a dintir a, Carrick-a hnuaia an chak hnuhnun ber chu September thlaa Champions League-a Sabah 4-0 a an sawp kha a ni.
Match zawh hnu lawkah United centre-back Lisandro Martinez chuan TV live interview-ah thil sawi na tak neiin, club director of football Jason Wilcox bakah Ineos lamin nipui transfer bazara sum an hman dan chu na takin a sawisel a ni. Kum 28 mi Argentina international hian Atletico laka an khelh dan chu chhe hle a a hriat thu zep lovin a sawi chhuak a, hemi hnu hian social media lamah pawh thuchhuah thui tak a siam zui bawk a ni.
He Martinez-a ṭawngchhuah dan chungchang hi The Overlap 'Stick to Football' podcast-ah sawiho a ni a, Manchester United legend Roy Keane chuan hetianga player-in an ngaihdan an sawichhuah chungchangah hian ngaihdan chi hnih a neih thu a tarlang.
Keane chuan, "Player-te hian eng thu nge an sawi anga, eng nge an sawi lo vang tih sawi tur hian eng thuneihna nge kan neih bik? A dik a dik lo tih lam ka sawi lo, mahse hei hi tunlai player-te thiltih dan a ni ve hrim hrim. Inkhelh zawh hian TV-ah live-in an rawn sawi mai a, social media-ah pawh an ti tho ang. Player-te thil sawi theih leh theih loh bithliahsak tur hian tute nge kan nih bik? Fan ṭhenkhat chuan a ṭha an ti ang a, fan ṭhenkhat erawh chuan team a timualpho tiin an sawi thung ang; a bikin a theihna sang ber la phochhuak thei lo player a nih ngat phei chuan. Team an buai mek a, amah pawh hian game 80 chauh a la khel a ni.
"Hetianga tih hian hlawkna a neih phei chu ka hre lo, mahse kawng lehlamah chuan, player-in a rilru natna leh a pai ruk phawrhchhuah a duh a nih chuan, sawi thei lo tura lo dan ngawt chu thil theih a ni lo. Tunlai player-te hi chuan TV-ah an sawi loh pawhin hmun dangah, social media lamah emaw an agent-te hmang emaw talin an tlangaupui tho ang," tiin a sawi.
Keane hian United senior player dangte zinga mi Bruno Fernandes leh Harry Maguire te chu sawichhuak bawkin, Martinez-a ṭawngchhuah dan chungchangah hian an zilh ngam dawn em tih a zawh thu a sawi lang bawk a ni.
"Bruno leh Maguire te, senior player pahnih ka rilrua rawn lang hmasate hian tukin zingah Martinez hi an zilh ve ang em tih ka ngaihtuah mai mai a ni. Mahse anni pawh podcast emaw thil dang tih velah an buai leh viau tawh maithei a ni. Tun hnaiah Bruno-a khawsak zia leh a awmdan (body language) in lo hmu em? Bruno-a chezia hi a hlim hmel loh khawp mai," tiin Keane chuan a sawi zui bawk a ni.
