Kum 2018 January thla khan Alexis Sanchez chuan Arsenal chhuahsanin Manchester United a zawm a, hemi ṭum hian Henrikh Mkhitaryan nen an inthleng a nih kha. Mahse, he Chilean international forward hian Old Trafford-ah hun duhawm lo tak hmangin, a tirte aṭangin a tluang lo nghal hle. Kum 37 mi Sanchez hian North London-a kum li dawn chhung Premier League player ṭha berte zinga a inhlangkai laia a theihna ropui tak ang kha Manchester-ah a pholang chhunzawm thei ta miah lo a ni.
Tun karah 'Stick to Football' podcast-a a inlan ṭumin, tuna Luton boss ni mek, a khelhpui ṭhin Jack Wilshere chuan Gary Neville-a zawhna chhangin, Sanchez-a'n United a pan kha thutlukna dik lo a nih thu a sawichhuak a ni. Neville hian Sanchez ang renga player theihna sang lutuk chu engvanga United-ah hlawhtling ta lo nge a nih tih a zawt a.
Wilshere chuan Arsenal-a zalenna a neih ang kha United-ah a nei ve lo nia a hriat thu tarlangin heti hian a sawi: "Ka hre lo le, kalsan miah loh tur a ni a. Jose [Mourinho] hian engtiang chiahin nge hna a thawh ṭhin tih ka hre lo, mahse ka sawi theih chu Sanchez ang player hi chuan Mourinho-a duhdan anga an insiamrem a ngai a ni. Arsenal-ah kha chuan zalenna tam tak a nei ṭhin a, chuvang chu a ni kan tana match min chaksak a, khingpuite a bum tlang zung zung ṭhin. Keini pawhin chu chu kan phalsak mai ṭhin a, United-ah erawh khatiang zalenna kha a dawng ve em tih ka chiang lo a ni," tiin a sawi.
Sanchez hian Red Devils tan season hnih chhungin game 45 chauh a khel a, goal nga (5) chauh khungin a che chhe hle a ni. A tawpah chuan 2019-20 campaign khan Inter Milan lamah loan-in an chhuahtir ta nge nge a, a season lehah Italian club lian hian a nghetin an lalut zui ta a ni. Mahse, Carrington-a a training hmasak ber aṭang reng khan Sanchez-a tan hian United-a a hun hman tur chu a chhe nghal sa der tawh tih a lang.
United chhungrila thil awmdan avanga a rilru a nat em avangin, Sanchez hian Arsenal-a kir leh vat theih dan a zawng nghal nghe nghe a ni. September 2020-a Inter a zawm hnu thla khat lekah heti hian a lo sawi chhuak tawh a: "United-a kal theihna remchang ka hmuh khan ka phur hle a, ka tan thil ṭha a nih ka ring a; naupang ka nih lai aṭanga ka lo ngainat em em club a ni bawk. Tichuan contract chu ka ziak ta ngei a, mahse club chhungril boruak eng nge thleng mek tih lam erawh ka zawt chhuak miah lo.
"A hmun i thlen hma chuan i hriatthiam phak loh thil tam tak a awm ṭhin a, Carrington-a kan training hmasak ber ṭum khan thil tam tak ka hrethiam nghal mai. Training zawh veleh in ka thleng a, ka chhungte leh ka agent hnenah, 'Contract hi pawtthler a, Arsenal-ah kan kir leh nghal mai thei lo em ni?' tiin ka zawt hial a ni. Anni chuan min nuihzat mai a, mahse ka ngaih a ṭha thei meuh lo. Contract ka lo ziak tawh bawk si a, ka thleng tawh bawk si. Thla tlemte a liam hnu pawhin chutiang rilru chu ka la pu reng a, khatih hun lai khan team pumkhat angin kan awm lo a ni," tiin Sanchez chuan a sawi.
Manchester United-a a theihna a phochhuah theih loh chhan dang pakhat chu manager Jose Mourinho-a'n amaha rinna a nghah tawk loh vang a ni bawk. 2018-19 season ṭan tirh thla khat hnu lekah West Ham an hmachhawn ṭumin, he Portuguese boss hian Sanchez hi matchday squad aṭangin a dahchhuak hmak a ni.
Hemi chungchang hi sawiin Sanchez chuan a hamhaih zia a sawichhuak a: "West Ham nena kan inkhelh ṭumin squad-ah min thlang lo a. Player ka nih chhungin chutiang chu ka la tawng ngai lo. Ka rilru a tibuai hle a, thil theih loh a nih ka ti hial a ni. Premier League-a player ṭha berte zinga mi ni ṭhin kha, thla nga chhung zet inkhel lo dinhmuna han awm chu a ni a. In ka thleng a, ka lungngai em em a ni. A tukah chuan ka hna hi ka hmangaih em avangin training vawi hnih (double shift) ka bei zui nghal ta a ni," tiin a sawi bawk.
