Manchester United boss Michael Carrick chuan he match hi 'chak ngei ngei ngai match' tia sawi dawt lo mah se, league mawngphah lama awm Tottenham Hotspur lakah point thum an hmuh ngei a ngai tih chu hai rual a ni lo. Roberto De Zerbi-a enkawl Spurs hian Premier League-ah vawikhat mah hnehna an la chang lo a, hei hi United tan hmasawnna boruak ṭha siam theihna hun remchang tak a tling a ni.

Carrick tan vanduaithlak takin, defender Patrick Dorgu leh Noussair Mazraoui te chu hliam vangin an inlan thei dawn lo. Hei hian tlarhnung siamrem kawngah thutlukna siam a ti awlsam zawk thung. Harry Maguire leh Lisandro Martinez te chu United boss-in centre-back a thlan hmasak ber an ni a, zanin inkhelah pawh hetiang hian an ding leh ngei tura beisei a ni; chutih rualin France tana international break laia che ṭha tak Leny Yoro pawhin bul ṭan a beisei ve hle bawk.

Midfield laili lamah erawh Kobbie Mainoo leh an captain Bruno Fernandes te chu bul ṭan ngei tura ngaih an ni. Mainoo hian England squad aṭangin inhnukdawk mah se, Carrick chuan training a zawm leh tawh thu a nemnghet a, chuvangin bul a ṭan theih ngei a beiseiawm. Mainoo a inlan theih chuan a kawppui tur zawn chiah chu zawhna awmchhun a ni ang.

Youri Tielemans leh Andrey Santos te'n he hmun hi an la hauh nghet chiah lo va, chu chu Brighton aṭanga lakluh thar Carlos Baleba tan hun ṭha a ni thei. Baleba hian United a zawm hnuah debut a la nei lo a, mahse Carrick chuan a fit famkim tawh tih a sawi chiang hle.

Tlarhma lamah Benjamin Sesko chu a inlan thei dawn lo lehzel a. He Slovenian centre-forward hian international break hmaa Fulham an tlawh ṭum pawh kha a hmaih tawh a, a chawnruh hliam (shin injury) avangin a ram Slovenia squad aṭang pawhin a inhnukdawk a nih kha.

Sesko a awm loh takah chuan Carrick hian thutlukna dang a siam a ngai dawn a ni. Tun season-a match zawng zawng hmaih tawh Amad chuan training a zawm ve leh tawh bawk a. Mahse August thla aṭanga a la inkhelh loh avangin bul ṭantir nghal chu thil hlauhawm thlentu a nih Carrick hian a hlau maithei a ni.

Chuvang chuan Bryan Mbeumo chu mual dinglamah a inlan chhunzawm leh hmel a, Matheus Cunha chu false nine role-ah chhawr a nih theih laiin, mual veilamah Marcus Rashford chu tlarhma tana thawhhlawk ber tura beisei a ni ang.

Tottenham laka United line-up tur rinlawk:

Lammens; Dalot, Maguire, Martinez, Shaw; Baleba, Mainoo; Mbeumo, Fernandes, Rashford; Cunha.