Inrinni hian Premier League-ah Manchester United leh Tottenham Hotspur te chuan inkhel pawimawh tak an hmachhawn dawn a. London club Tottenham hi league mawngphahah an ṭhu mek a, Manchester United pawh 12-naah awmin team hnih te hian beisei an pha lo dun hle a, an head coach ve ve pawhin sawiselna nasa tak an tawk mek a ni.

Hetiang boruak rit tak karah hian United ṭantute chuan khelmualah inthlakdanglamna hmuh an duh hle a. Kumin nipui bazara Brighton aṭanga an lakluh Carlos Baleba chu hliam vanga a chawlh hnuah a inlan theih tawh dawn em tih chu zawhna lian tak a tling chho a ni. Kumin season ṭan tirh aṭanga kerek hliam vanga inlan thei lo he Cameroon international hi kar hmasa khan Sport-Lausanne nena training match an neihah a inlan tawh a, Tottenham lakah hian bul a ṭan nghal mai an beisei hle.

Mahse Zirtawpnia chanchinbumite zawhna chhangtu United boss Michael Carrick chuan, kum 22 mi Baleba hi hmanhmawh taka khelmuala luhtir nghal ngawt a tum loh thu leh, dawhtheihna neih a la ngai rih tih a sawi chhuak.

Carrick chuan Baleba chungchang sawiin, "Ni e, Carlos-a dinhmun hi a ṭha chho tawh hle a ni. Khelmual chhung lama a rawn kir leh a, hnai taka a theihna kan hmu thei hi a lawmawm khawp mai. Kar liam taa training game kan neihah khan a inlan zawk a, minute tlem a khelh theih kha a tan thil ṭha tak a ni bawk. Mahse lehlam zawng taka thlir erawh chuan hun tam tak a hmaih a, pre-season tawp lam hun pawimawh tak tak a channa khan nghawng a nei ve bawk a ni,"

"Chuvangin a theihna tak tak a chhuah theih nan dawhtheihna tlem neih a ngai a, a khelh hun tur dik tak thlan pawh keimahni mawhphurhna a ni ang. Amaherawhchu ani hian theihna tam tak min rawn thlen dawn tih a chiang. A hma pawhin ka sawi tawh ṭhin ang khan, midfield-a player kan neih mekte hi kan lungawipui em em a, thlan tur kan ngah bawk a, Carlos-a hian chu kan theihna chu a rawn belhchhah ngei ang," tiin a sawi.

United tlar lailiah hian player thar Youri Tielemans chuan bul a ṭan chhunzawm leh a rinawm hle a. Chelsea aṭanga lak thar Andrey Santos pawh thlan theih zinga mi a nih laiin, he Brazilian rawlthar hian tun season chhungin minute 175 chauh a la khel thung. Hemi rual hian ram tana chawlh lai khan Kobbie Mainoo chu hliam vangin a inlan thei lova, Carrick-a'n press conference-ah a khelh theih tur thu chiang takin a sawi lang lo bawk.

Carrick-a'n inkhelh hmaa a squad thlan chhuah tur a zep tlat hi thil awm tak a ni a, Tottenham boss Roberto De Zerbi pawhin chutiang tho chuan an squad a puanzar lawk loh thu media hmaah a lantir ve bawk. Midfield-ah tu pawh Carrick hian chhawr dawn se, United ṭantute chuan Tottenham lakah point thum hlu tak an hmuh ngei an beisei a ni.