International break zawh hnuah Manchester United chu Premier League inkhel hmachhawn turin an inlan leh dawn ta a. Point thum hlu tak inchuhin Old Trafford-ah Tottenham Hotspur an lo mikhual ang.
United head coach Michael Carrick chuan he match hi "inkhel dang ang tho" a nih thu sawi mah se, Spurs lakah an inthlahdah tur a ni lo tih a naute a chah lawk a ni. Carrick chuan, "Game i en chuan player ṭha tak tak nei team ṭha tak an ni tih a lang. Kumin nipui khan squad danglam tak an din a, an khelh ṭhat phu erawh chuan result an la hmu lo mai thei a ni," tiin a sawi.
Hetiang lai hian kar liam ta chhung khan an elpui lian Manchester City-in sum leh pai hman dan dik loh chungchanga thubuai an neih chu chanchinbu hmai luah ber a ni a. Premier League-in thubuai 115 an siamsak zingah commission hranpa chuan thubuai 114-ah City hi thiam loh a chantir a ni.
United rawlthar Gabriel-a chungchang:
Thla hmasa khan kum 15 mi forward JJ Gabriel chuan Old Trafford chhuahsan dilna lehkha (transfer request) a thehlut a. Hemi hnu hian United chuan he rawlthar hi chelh tumin official scholarship proposal an chhawpchhuak ta a ni. Chutiang offer chhawp ni mah se, Gabriel hian ram danga chhuah a thlang a nih chuan Barcelona, Real Madrid leh Bayern Munich te ngaihven Gabriel hi United hian sum tlem te, £350,000 vel chauhin an chan thei tho a ni.
September thlaa Gabriel-a'n chhuah a dil khan Europe khawmualpui a barakhaih hle a nih kha. Premier League academy dan hnuaiah chuan United hian scholarship proposal hi an thehlut lo a nih chuan, Gabriel hi January thlaah man chawi lovin club dangah a chhuak thei dawn a ni. Mahse The Guardian tarlan danin United hian he rawtna hi an thehlut fel ta a, hei hian transfer kalphung a thlak danglam ta a ni.
Gabriel hian United rawtna hi a hnawl a nih chuan, Premier League club dangte chuan United hi tlang takin an dawr a ngai tawh dawn a. Inremna an nei thei lo a nih pawhin Professional Football Compensation Committee tribunal-in zangnadawmna zat tur an bithliahsak ang a, United hian a tlem berah £3million bakah nakina hralh lehna aṭanga zaa 20 (20% sell-on clause) an hmuh an inbeisei a ni. Mahse Europe ram danga club a pan a nih erawh chuan compensation hi a tlem fê thung ang.
City thubuai Carrick-a'n a sawichhuak:
Manchester City thiam loh chantir an nih chungchangah Carrick chuan ama mimal nun thlengin a nghawng thu a sawi a, he thil hi rang thei ang bera chinfel a nih a duh thu a sawi. City erawh chuan thiam lohna an neih loh thu la ṭangin an khing let (appeal) mek a ni. Heng dan bawhchhiatna hi 2009/10 leh 2017/18 inkar ami a ni a, khang hun lai khan Carrick hi United tana khelin Premier League-ah City dawtah pahnihna an lo nihpui tawh a ni.
Carrick chuan, "Kawng tam takin sawi a harsa a, zawhna tam tak a chhuah phah a ni. A la kal mek a, ka sawi theih tawk a tlem hle. Keimah ngei pawh min nghawng ve avangin zawhna ka nei ve bawk. Engtin nge a kal zel dawn chu kan en ang chu. A hma thei ang bera thil a chian hi mi zawng zawng tan a ṭha ber a ni.
"Khang huna chak lawmna kha eng kawng mahin a dawn let theih tawh loh. Kan zawngchhang ṭhin leh kan duh ber chu a vawrtawp thlen kha a ni a. Thil liam tawh chu a liam tawh a ni. Thutlukna rang taka siam hi a pawimawh em em a, mitin tan a chian vat a, hma lam pan a ngai a ni," a ti.
League title an chan loh ṭuma medal kha a duh leh em tih an zawhna chhangin Carrick chuan, "Tun dinhmunah chuan a la fel loh avangin engmah ka la sawi lo ang. Sport khawvel chanchinah hian medal hi a hnu fe a dawn chuan a hlutna a bo tlangpui. Khelmuala chak tura beih hun laia hlawhtlinna kha a ni kan zawn ber chu ni," tiin a sawi a ni.
