Portugal national team manager thar Jorge Jesus-a hnuaia a vawikhatna atan Portugal chuan Wales lakah 1-0 in hnehna an chang a. He match-ah hian Manchester United captain Bruno Fernandes chu tlar laili hnung deuhvah (deeper role) chhawr a ni a, he a khelhna hmun thar chungchang sawifiah nan hian Portugal boss Jorge Jesus chuan United manager hlui Ruben Amorim-a hnuaia Fernandes-a lo khelh tawh dan a tarlang a ni.

Season liam ta khan Michael Carrick-a'n Manchester United enkawl tura a let leh hnuah, Fernandes hi a khelh nuam tih ber No. 10 position-ah a dah let leh a. Season chawhnu lama a chet ṭhat em avang hian a vawikhatna atan Premier League Player of the Season-ah thlan a ni hial a ni. Mahse, Carrick-a lo thlen hma khan, manager hlui Ruben Amorim-a chuan Fernandes hi tlar laili hnung deuh, inthununna ngai pawimawh tak hmunah a lo chhawr ṭhin a, Casemiro nen an inkawp tlangpui ṭhin. Nilaithawhṭan zan khan Portugal tan pawh hetiang hmunah hian a khel leh a ni.

Hetiang hmun hnung deuhva khel mah se, Fernandes hian Wales lakah khan khelmuala inlan dang zawng aiin chance a siam hnem ber a, ball pawh a chang hnem hle. United lamah erawh kumin nipui chhung khan tlar laili thuam nan player thar pathum - Andrey Santos, Carlos Baleba leh Youri Tielemans te chu Casemiro-a chhuah hnuah an lalut thar a. Carrick hian tlar laili rem dan tur dik tak a la thlang fel chiah lo a ni. Hetiang a nih lai hian, Kobbie Mainoo-a'n tlarhnung venhimna lamah ṭanpui a mamawh avangin, Fernandes hi hnung lama pawt let lovin, tlarhma hlauhawm lai bera chhawr chhunzawm an tum zawk a ni.

Mahse, Portugal head coach Jorge Jesus-a ngaihdan erawh a dang thung. Wales an hneh hnuah chanchinbumite hmaah Jesus chuan Fernandes-a khelhna hmun chungchang hi sawifiahin, "Ruben Amorim-a hnuaia United-a a season hmasa ber khan he hmunah hian a khel ṭhin a ni," tiin a sawi.

Jesus chuan sawi belhin, "United khan tlarhmaah player pathum an chhawr a, mual veilam sir deuh, laili hnaihah khan a khel ṭhin. A nihna takah chuan midfielder a ni mai. Ball kan chan laiin in hmuh ang khan a che a; ball kan chan loh erawh chuan hnung lamah a tawlh luh a ngai a, a hnunga khel left-back a ṭanpui a ngai ṭhin a ni. Hei hi a lo khelh tawhna hmun a nih avangin thil thar a ni lo.

"A career-ah hian season hnih liam ta chhung chiah khan second striker angin a khel a, a nihna takah chuan second striker a ni ngai lo. Central midfielder-ah a khel ṭhin a, a nih loh leh vawiina ka khelhtirna hmunah hian a khel ṭhin a ni. Ka hnuaiah pawh central midfielder-ah a khel tawh a; United-ah pawh defensive midfielder kiangah central midfielder-ah a khel ṭhin. Bruno hi central midfielder a ni tih kan hre vek a, winger a ni ngai lo va, mahse vawiin ai khan a khel ṭha thei a ni," tiin a sawi.

United ṭantute tan erawh Amorim-a hun lai hriat chhuah leh chu thil chakawm tak a ni lo vang a, Fernandes-a'n hnung lamah a khelh leh pawh an duh lo hle ang. Mahse, Portugal tana a khelh dan en hian hmakhuaah eng nge thleng dawn tih erawh hriat a la ni lo a ni.