Kum hnih-thum liam taa Pep Guardiola-a'n milar Julia Roberts-i'n Old Trafford a tlawh thu a sawichhuah sakawt aṭang khan Manchester United len zawng leh hmingthan tluangtlam zia a lang chiang hle a. Sir Alex Ferguson-a'n a dam chhungin Manchester City tan top dog nih a theih loh tur thu a lo sawi tawh angin, City hian khelmual chhungah hlawhtlinna chang zawk fo mah se, khawvel huap leh media-ten an ngaihven danah chuan United hi an la lian zawk hle a ni. He thil avang hian United player-te hian media leh fans-te aṭangin pressure leh endikna (scrutiny) sang zawk an hmachhawn reng ṭhin.
Kumin nipui transfer bazar chhung khan Manchester United chuan Chelsea aṭangin kum 22 mi Brazil midfielder Andrey Santos chu £50m-in an la lut a. Mahse tun season-ah inelna hrang hrangah minit 175 chauh khelmualah a la inlan avangin, mi tam takin an chhui zui nghal hle a ni. Chutih laiin, an elpui Manchester City chuan Lille aṭangin kum 18 mi Ayyoub Bouaddi chu £86m ngawt senga an lakluh hnuah match pahnih bul ṭanin, minit 187 chauh a khel ve tho a, mahse media-te aṭangin sawiselna leh pressure engmah a dawng ve lo thung. Hei hian club pahnih inthlauhna leh United-a zui zeltu pressure lian zia a pholang chiang hle a ni.
City hian kumin nipui chhungin Premier League-a sum seng hnem ber niin £458m ngawt an hmang a, Bouaddi-a man atan an transfer budget aṭanga zaa 18 (18%) chauh an hmang a ni. Chutih laiin, United erawh chuan transfer budget atan £150m chauh an nei a, chumi aṭanga hmun thum a hmun khat (zaa 33) ngawt chu Santos-a lakluh nan hian an hmang thung. Hei vang hian kum 22 mi, Premier League-a lo inlan tawh Santos-a lakah hian beiseina a sang lo thei lo a ni.
Pre-season-ah che ṭha in, season ṭan niah Hull City lakah Santos hian bul a ṭan a, mahse Ipswich, Everton, Sabah, Manchester City leh Fulham an hmachhawnnaah head coach Michael Carrick chuan Youri Tielemans, Kobbie Mainoo leh Bruno Fernandes-te midfield-ah a hmang zui ta zawk a ni. Brighton laka Carabao Cup-a an tlawm ṭum khan Santos-a hi bul a ṭantir a, mahse a chet ṭhat tawk loh avangin sawisel a hlawh zui bawk.
Hemi hma hian Ireland-a pre-season an hman laiin Carrick chuan, "Andrey hi rawlthar te ni siin a mizia hi a puitling em em a, mumang a taka thleng ang mai a ni. Mi entawn tlak, puitling tak leh nun zaidam tak a nei a, kan lalut thei hi ka hlim takzet a ni," tiin a lo fak hle tawh a ni.
United legend Paul Scholes pawhin Santos-a lakluh dan hi a lo sawisel tawh a. Scholes chuan, "Santos leh Baleba te hi physical lamin ṭha mah se, Chelsea-ah match 11 chauh khel tawh Santos-a man atan £50m an hmang a, mahse team-ah bul a ṭan hleithei bawk si lo. United ang club chuan season ṭan tir aṭanga league title min lakpui thei tur player an la lut tur a ni," tiin a sawi a ni. United hian hma an sawn chhoh zel nan player thar lakluhte lakah beiseina a san bakah, media spotlights hnuaiah hun an hmang chho zel rih dawn a ni.
