Manchester United chuan a zawnin match thum chhung chak hmel an hmuh tawh loh hnuah, international break chhung hian manager Michael Carrick chuan an harsatna tawh mekte chinfel theihna hun remchang a nei dawn a ni. Pathianni liam ta khan United hian Fulham lakah harsa takin 1-1 in point khat an hlawhchhuak hram a, tun season bul an ṭan dan chu a fuh lo hle reng a ni.
Premier League-ah United hi 12-na dinhmunah an awm mek a, August thlaa Ipswich 5-2 a an hneh kha tun season-a league match-a an chak chhun a la ni. An tlarhnung venhim lam pawh a ngaihtuahawm hle a, inelna hrang hrang khelh pasarih aṭangin clean sheet vawi khat chauh an la nei a ni. Hetih lai hian academy rawlthar theihna ngah JJ Gabriel chuan club chhuahsan a tum nia sawi a nih bawk avangin tlarhma dinhmun pawh a ngaihvenawm hle.
United captain hlui Wayne Rooney chuan striker Benjamin Sesko-a rilru puthmang chu a sawisel a. He Slovenian striker hi chawn ruh (shin) na vanga Fulham lakah a inlan loh hnuah, Slovenia national team aṭangin a inhnukdawk zui a ni. Feet 6 leh inches 5 a sang striker hian season liam ta tawp lam, pitch sira a tluk sual aṭang tawh khan he chawn ruh na hi a lo nei tawh a ni.
United player hlui Paul Scholes leh Nicky Butt te pawhin 'The Good, The Bad and The Football' show-ah Sesko-a chungchang hi sawiin ngaihṭhatlohna an lo lantir tawh a, Butt phei chuan, "I chawn ruh a tliak a nih loh chuan khelh mai tur a ni," tiin a rilru puthmang a lo sawisel tawh a. Rooney pawhin United tana khel tur chuan Sesko hian rilru paukhauh a mamawh tawk lo niin a sawi ve bawk.
'Stick to United' podcast-ah Rooney chuan, "Chawn ruh maw? A tliak em ni? Chawn ruh chu a na thei a, inpal thluk te pawh a tuar theih alawm... Shinpad te reuh te te, awmze nei lo tak tak kha a vuah ve ngei bawk ang maw le. United tan nambar 9 nih i tum a, chak ngei ngei ngai match hmachhawn tur in neih laia i chawn ruh thip te mai vanga i khel duh lo a nih chuan... buaina lian tak a tling a ni.
"Khel thei lo khawpa i taksa a chhiat a nih loh chuan, hliam chung pawhin i khel tur a ni. Inkhelh hma te khan injection min chiu ṭhin a, doctor-ten kan mawngah damdawi min chiu lut ṭhin a nih kha," tiin a sawi chhuak hial a ni.
Hetih lai hian, Germany chanchinbu Bild chuan kum 15 mi JJ Gabriel chu 'United a chhuahsan ngei ngei dawn' tih tarlangin, nakkum nipui a liam hmain a chhuak ang tih an puang a. Premier League chhuahsana Bayern Munich, Barcelona, Real Madrid leh Paris Saint-Germain te zinga pakhat zawm turin a inpeih niin an tarlang bawk.
Gabriel hian 2022-a United a zawm hmain Chelsea, Arsenal leh West Ham academy-ah hun a lo hmang tawh a. EU passport neih theihna kawng a inhawn avangin Europe club liante pan kawngah harsatna a nei dawn lo a ni. A nu hi Cyprus mi niin, a pa Joe erawh Republic of Ireland tana khel tawh a ni a, Gabriel leh a aiawhtute hian Spain ram pan an duh ber niin tarlan a ni. Hma hun hnai maiah United-in title an lak theih an inrin tawk lohna chuan a thutluknaah nghawng lian tak a nei nia sawi a ni a, United-a a registration tihtawp a dilna chu club lamin an lo hnawlsak tawh bawk a ni.
