Manchester United head coach Michael Carrick chuan a hna a chelh zui zel theih nan hun pek belh turin club hotute hnenah ngenna a siam a, manager-te chunga rinna nghah zui zel a hlawkzia entirnan Mikel Arteta leh Diego Simeone te sulhnu a kawk chhuak bawk.
Season liam ta chawhnu lamah Carrick hian Premier League match 17 a khelhah vawi 12 hnehna changin United chu Champions League khel turin a hruai tling a. Mahse kumin Champions League khualmual match hmasa ber an khelh dawn mekin, a dinhmun a derthawng chho nghal der mai a ni. Tun season inelna hrang hrangah match riat an khelh tawh zinga vawi hnih chauh an la chak a, kum 40 chhunga league bulṭan chhiat ber record an siam mek a, Thawhlehni zan hian Atletico Madrid an hmachhawn dawn bawk a ni.
Chutichung chuan beidawn mai a tum lo tih lantirin, Arsenal leh Atletico Madrid lamin hun an pek hnuah Arteta leh Simeone ten hlawhtlinna an chan zui dan chu thil thleng thei a nih thu a sawi lang. Kum 45 mi hian hetiang hun harsa paltlang chhoh hi nuam a tih zawk thu sawiin, he harsatna hian a squad zinga a kianga ding duh tak takte chu a thliar hrang mek niin a sawi bawk.
Simeone-a kum 15 ropui taka a lo enkawl tawh Metropolitano stadium-ah Carrick chuan, "He hmuna hun rei tak lo awm tawh coach kiangah hian ka ṭhu mek a, thil ruahman anga a kal loh hun pawh a awm ve ṭhin ngei ang tih ka hria. League te an la a, Champions League tawp thleng an inhlangkai ṭhin a, mahse duh anga kal loh chang chu an nei ve ṭhin. Thil a kal tluang loh hian chhiatna lian tak thleng anga ngaiin engkim thlak vek ngai anga ngaih dan a lian ṭhin a, chu erawh ka rilru puthmang a ni lo," tiin a sawi.
Carrick chuan sawi zawmin, "Thil eng emaw tak hlawhtling tur chuan harsatna i hmachhawn a, i paltlang a ngai a, chu chu a kalphung ve reng a ni. Ka player hun chhung zawng pawhin ka lo ti tawh ṭhin a. Thil a kal tluang loh hian hetiang hun hi ka ngaina zawk a ni, hetih hunah hian i kiangah tunge awm tak tak a, club nena inthlung ngheta hun rei tak cham duh tak tak tu nge tih a lang chhuak ṭhin a ni," a ti bawk.
Tun dinhmunah Carrick hi ban nghal mai theih dinhmunah a la ding lo na a, a chunglama pressure nasa tak awm mek tiziaawm tur chuan chawplehchilha khelh ṭhat leh hnehna chan a mamawh tih a hai lo. Inrinni khan Tottenham nen an inhnehtawk ṭumin mipui lam aṭangin au elna (booed) an tawk tawh a ni.
Manager zawn ngun lutuk United tan hian kawng dik zawh mek nia inngai Carrick-a tana hun pek belh hi thil awm tak a nih thu a sawi bawk. Carrick chuan, "Sawi chu hrehawm ka ti hle a, mahse season liam taa kan rama league champion-tu manager pawh kha hun rei tak a awm tawh a ni. Kum sarih a ni tawh a, a season hmasa pahnih phei kha chu pasarihna emaw pariatna emaw chauh an ni. Mikel-a'n hna ropui tak a thawk a, chu pawh chu entirna pakhat a ni," tiin Arteta-a sulhnu chu a tarlang tel a ni.
