Inrinni-a Chelsea laka an tlawm tak avangin Manchester United chu relegation zone chung chiahah an awm mek a, thla hnih chuang zet Premier League match-ah hnehna an la chang lo a ni.

INEOS leh United hruaitu ten inbiakna ngawrh tak an neih hnuah, a tirah chuan head coach Michael Carrick hi chhawr zui rih an thlang a. Hei hi Carrick-a contract tihtawpna tura sum sen ngai a tam em bakah, a thlaktu tur atan manager langsar bawk si, lakluh mai theih tur an hmuh loh vang a ni.

Mahse, team dinhmun a tlakhniam chhoh zel bakah, European club lian Juventus-in German manager Julian Nagelsmann lakluh tumin inbiakna an ṭan tak avangin Manchester United pawh hi an che chhuak ve ta hluai mai a ni. United hotute chuan Carrick-a thlaktu atan Nagelsmann hi lakluh theih a nih leh nih loh chiang turin a aiawhtute an be pawh nghal a ni.

United tan dinhmun a ṭha lo hle a, season liam ta aṭanga an tlahniam ta char char hian manager thlak tura ruahmanna an siam nan nghawng lian tak a nei mek a. INEOS lam hian squad thuam ṭhat leh management lam siksawi nan hma an la mekah, Carrick-a hmabak erawh chu mi tam takin ban tawh tura an ruahman laiin, pawisa chhuak tur a tam em avangin hotute hi an fimkhur hle ṭhin.

Mahse tunah chuan Juventus-in Nagelsmann an umzui tak avang leh Old Trafford-a fans te lungawi lohna a san chhoh tak zel avangin, United hian khelmual chhung leh pawna thawhhnawk siamṭha turin manager chak zawk leh manager tluang pangngai zawk lakluh hi an pan lo thei ta lo nia ngaih a ni.