Manchester United-in Michael Carrick ban a nih thut a, manager thar ruat an tum a nih chuan Newcastle United boss hlui Eddie Howe chuan Old Trafford-a hna chelh hi a inhuam hle nia tarlan a ni.
United director of football Jason Wilcox chuan Old Trafford-a mawhphurhna la tur hian Howe hi a duhsak ber nia sawi a ni a, hemi chungchangah hian a aiawhtute inkarah inbiakna hmasa pawh neih a ni tawh tih thudawnnate chuan an tarlang.
Manchester United te'n tun season bul an ṭan ṭha lo hle a, Premier League match pakuah (9) vawi khat chauh hnehna an la chan avangin table-ah 17-na dinhmunah an tla thla ta hial a ni. Carrick-a naute hi inelna hrang hrang match pakuah a zawnin an la chak miah lo a, heng zingah hian Champions League-a Atletico Madrid laka 2-0 a an tlawm bakah Como laka 4-1 ngawta an tlawm ṭumte pawh kha a tel a ni.
Tun hnaia Premier League match-a Bournemouth leh Chelsea te laka an tlawm leh tak avang hian manager Carrick-a laka phunnawina boruak a sang lehzual hle a. Manager thlak phut tu ten chhuahsan turin phut nasa hle mah se, United thuneitute chuan tun dinhmunah rih chuan Carrick hi chelhhren rih an thlang a ni.
Report-te tarlan danin club hruaitu liante inkarah kum 45 mi Carrick-a thlaktu tur chungchangah ngaihdan inang an neih hleithei lo a, hei hian thutlukna siam a titlaitluang a ni. Amaherawhchu, club hotute hian a aiawhtur zawn hna kalpui ngai a nih leh nih loh rel nan November international break thleng Carrick hi hun pek rih an inrempui nia hriat a ni.
The Guardian thuchhuah danin, Howe hian Old Trafford pan hi a inhuam hle a, mahse inremna siam tur hian inbiakna neih a ngai ang. Chu mai bakah, he English manager hi lalut tur chuan United hian Newcastle hnenah zangnadawmna atan £3million vel an pek a ngai dawn a ni.
Hemi rual hian United recruitment director Christopher Vivell chuan Germany leh Bayern Munich manager hlui Julian Nagelsmann chu a ngaimawh hle a. Vivell hi Nagelsmann nen RB Leipzig-a an lo thawhdun tawh avangin, he German manager hian Manchester United boss nih a chak pui em tih ngaihven turin inbiakna a lo neihpui tawh thute pawh tarlan a ni.
Chuti chung chuan United hruaitu ṭhenkhat chuan Carrick hi club dinhmun thlak danglam thei turin an la ring tlat thung a. Inrinnia Stamford Bridge-a Chelsea 2-0 a an tlawm hnuah pawh zui chhuaktu fan-te thlawpna a la hmu reng a ni.
Chelsea laka an tlawm hnuah Carrick chuan Champions League match lehah Roma an hmachhawn hunah United a enkawl zui zel dawn em tih zawhna chhangin, "Ni e. Hma kan sawn a, match kan chak a ngai a ni, chu zawng chu a ni mai. Tunah hian ṭawngkam eng pawh hmang ila engmah a thlak dawn lo. Football match-a i chak ta a nih chuan league-ah i chho zung zung mai dawn a ni," tiin a sawi.
Season bul an ṭan chhiat em avangin United hi goal difference vang chauhin relegation zone chung chiahah an awm mek a ni. Kum 1986 November thlaa Ron Atkinson ban a nih hnu leh Sir Alex Ferguson-a'n a thlak hnu khan United hi August thla hnu lamah top-flight hnuai lam pathumnaah (bottom three) an la tla ngai lo hrim hrim a ni.
Tunah chuan an rilru zawng zawng Champions League lamah an nghat leh tawh a, November ni 3 (Thawhlehni) hian Old Trafford-ah AS Roma an mikhual dawn a, hemi hnu ni nga a liamah international break thlen hmaa an match hnuhnung ber atan Aston Villa an hmachhawn zui leh dawn a ni.
