Manchester United chuan an academy product, winger theihna ngah tak Noah Ajayi chu a vawikhatna atan professional contract an ziahpui ta tih an puang.

Kum 17 mi hian Red Devils-ah hian contract hun rei tak daih (long-term contract) a ziak a ni. Thla liam ta khan Manchester Evening News chuan Ajayi hi pro deal ziak tur hian a hnaih tawh hle tih an lo tarlang tawh a, tunah hian a taka tihpuitlin a ni ta.

Ajayi hi season liam ta khan Darren Fletcher-a enkawl Under-18 team-ah a inlan ṭha hle a. FA Youth Cup campaign chhung khan media leh mipui mit fukna ber chu JJ Gabriel-a chungchang ni mah se, Ajayi hian a theihna a phochhuak tlat thung. Youth Cup-ah hian goal hnih khungin, season liam ta chhung khan inelna hrang hrangah a vaia campaign chhunga goal 9 ngawt a khung tling hman a, team-in FA Youth Cup final an thlen theih nan a pawimawh hle a ni.

Manchester United chuan official thuchhuah siamin, "Youngster phurawm tak Noah Ajayi chuan Manchester United-ah a hmakhua a humhim ta. Kum 17 mi winger hian long-term professional contract a ziak a ni. Ajayi hi Darren Fletcher-a Under-18 side-ah season liam ta khan an rinrawl a ni a, Young Reds-te'n FA Youth Cup final an thlen theih nana thawhhlawk tak a ni. He rawlthar hi United Under-21s tan pawh a lo inlan tawh bawk. Hamburg-a piang he forward hian Germany youth level-ah pawh a ram aiawhin a lo inlan tawh a ni. Manchester United-a mi zawng zawngte chuan Noah-a'n contract thar a ziak hi kan lawm em em a, a hmasawn zel dan tur thlir kan nghakhlel hle a ni," tiin an tarlang.

Hamburg-a piang, Germany youth international hi United Under-21 team-ah pawh a lo inlan tawh a, hmasawn zela first team thleng chho tur anga beisei a ni. Ajayi-a contract thar ziah thu puan a nih hi, Manchester United-in Manchester City academy aṭanga Karim Cassim an lakluh fel thu an puan hnu ni khat lekah a rawn thleng a ni. Hei bakah hian David Eze-a transfer pawh puanzar a ni ṭep tawh a, Liverpool aṭangin Isaac Konde pawh an lo lalut fel tawh bawk. Old Trafford club hian hmakhua thlirin an youth system thuam chak nan rawlthar theihna ngah tak tak lakkhawm zui zel an tum hle tih a lang chiang hle a ni.