Manchester United chuan tualchhung Trafford Council-te nena mipui ngaihdan lakna (public consultation) an lo neih tawh chu an zo fel ta a, hei hi seat 100,000 leng stadium thar sak an tumna kawnga hmasawnna lian tak a ni.
Manchester club hian tuna an mual hman mek, seat 75,000 leng Old Trafford chu thlak a, he stadium thar ropui tak hi sak an tum a ni. The Sun report danin he project atan hian United hian £2 billion zet sen an inbuatsaih nia sawi a ni a, mahse hei hi chhut dan mai a la ni a, club lam aṭangin official thuchhuah an la siam lo thung.
July thla aṭang khan Trafford Town Hall, Media City, Gorse Hill Studios leh Metro Sports Club-ah te mipuite nena inbiakna leh ngaihdan lakna hun hi an lo pui chhuak tawh a, tualchhung mi leh fan-ten an ngaihdan leh rawtnate an thehlut a ni. Inbiakna leh meeting an neih tawh zawng zawngah United hotute an tel kim ṭhin a, online lam aṭang pawhin mipui ngaihdan lak a ni bawk.
Mipui aṭanga ngaihdan leh rawtna hrang hrang an hmuhte hi United hian an masterplan siamṭhat leh chher hriam nan an hmang dawn a ni. Hemi hnu hian sorkar thuneitute hnenah puitling takin planning permission an dil chauh ang. Hei hi he project tana hmachhawn tur lian ber leh harsatna awm thei a la ni a, tun dinhmunah permission hi an la hmu rih lo a ni.
Kum 2024-a INEOS leh Sir Jim Ratcliffe-a'n Manchester United football operations mawhphurhna an lak hnu khan stadium thar sak hi an ngaihpawimawh berte zinga mi a ni a. Hemi puala task force an din hnuah, Old Trafford hlui hmun sawhṭhat chawp aiin a bula stadium thar seat 100,000 leng din mai chu thil tihchhoh zel atan a ṭha zawk tih an thutlukna a ni.
Sir Jim Ratcliffe-a'n he stadium thar hi England rama football hmunkhawp ber Wembley Stadium tluk pha leh kitat tur stadium ropui taka din a duh thu a lo sawi tawh a. Architect hmingthang Foster and Partners te chu he project design duangtu tur hian an thlang fel tawh a, mual sakna tur ram (land acquisition) chungchanga buaina leh tlai khawtlai lo awm tawh pawh kumin tir lam khan an lo chingfel tawh a ni.
Mahse public consultation thlen fel a nih vang mai hian stadium sak hna hi inṭan nghal mai dawn tihna a ni lo. Planning permission hmuh hmasak a ngai a, process hrang hrang a tluang taka a kal zel a nih chauhvin hna hi a taka ṭan a ni ang.
