Manchester United Muslim Supporters' Club chuan an club co-owner Sir Jim Ratcliffe-a laka rinna an neih tawh loh thu (statement of no confidence) an lo chhuah tawh chungchangah hrilhfiahna an siam leh ta.

Kar liam ta khan Manchester United Muslim Supporters group hian thuchhuah siamin, Ratcliffe-a hi club aṭanga "a chhuah a ngai" ("must go") tiin an lo ngen tawh a ni. Hei hi Ratcliffe-a'n United Kingdom (UK) rama immigration (ram danga aṭanga lo pem lut te) chungchang leh ram dinhmun chungchanga ṭawngkam inhnialna chhuaptu tak a hman hnuah a thleng a ni.

He fan group-te hian Ratcliffe-a ṭawngkam hman hrang hrang avangin lungawilohna lian tak an nei a, he thil avanga supporter-te leh tualchhung mipuite zinga boruak awm mek zelah an thuchhuah hi an siam a ni.

Sir Jim Ratcliffe-a'n khelmual pawna a ṭawngkam hman avanga titi a chhuah nasat hnuah leh, tualchhung mipuite leh United fans ṭhenkhat laka sawiselna a tawh zui tak avangin, Manchester United Muslim Supporters' Club te hian an dinhmun tichiang tur leh an ngenna lo siam tawh chungchanga hrilhfiahna pe turin an rawn ṭawngchhuak nawn leh ta a ni.