Manchester United midfielder Carlos Baleba chuan kumin nipui transfer bazar chhunga Old Trafford a pan hnuah a club thar tan match khat mah a la khel lo a. Chutih laiin, Fulham forward Josh King chuan Premier League-a a hmachhawn tawh zinga hmachhawn harsa a tih ber a nih thu sawiin he rawlthar hi a fak hle.

The Peoples Person-in a tarlan danin, King-a'n hetiang taka Baleba a ngaihsang hi mak tih a hlawh hle, a chhan chu kum 22 mi hian kumin nipui transfer bazar chhung khan United zawm mah se, tun season-ah United tan khelmual a la rah miau loh vang a ni. Mahse, hei hian head coach Michael Carrick-a'n khelmuala a chhawr hmain, Premier League-a a khingpui turte lakah he rawlthar hian zah a lo hlawh hle tawh tih a tarlang chiang hle a ni.

Brighton & Hove Albion-in a tir lama an dawrna lo hnawlsak tawh mah se, United-in kumin nipui transfer bazar chhung khan £70million zet thehchhuakin Baleba hi an la ta nge nge a. Mahse, Brighton-a a awm laia pre-season training an neihnaa a ke-rek hliam (ankle ligament injury) a neih tak avangin khelmualah a inlan thei rih lo a, United-in season bul an ṭan chhoh hnu pawhin matchday squad-ah a hming hmuh tur a la awm lo a ni.

Premier League match nga ngawt khelh a nih tawh hnuah pawh Baleba hi a la inlan thei lo a. Fulham laka Craven Cottage-a an va khelh ṭum khan matchday squad-ah telh ni mah se, bench-ah ṭhuin chhawr loh substitute a ni a, United tana a debut khelhna tur chu nghah a la ngai rih a ni. Tunah hian kar thum chhung ram hrang hrang match khelh chhung (international break) a awm mek a, hei hi a fitness ṭha ber thleng tura a inbuatsaih nan hun remchang tak a ni dawn a ni.

Baleba-a taksa chakna leh a khelh dan phung hi tun hnaia United tlar lailiin an lo mamawh em em kha a ni a. Khingpuite chetla lai tibuai thei tak, ball an chan ruala rang taka umzui nghal thei leh, tlar laili aṭanga tharum hmanga ball hma lama nawr chhuak thei player a ni.

United ṭantute chuan an team-in khelmuala thawhrimna, pressing leh tlan nasat lam an tlachham hle nia ngaiin an lungawi lo hle a, Baleba-a rawn kir leh tur hi an sawiselna chhanna tur dik tak a nih an beisei hle. Tun season inṭan aṭang hian United hliam neite rawn kir hun tur hi sawi hlawh ber pakhata a la ni reng a, Baleba-a rawn kir leh tur hi United tana phurna thar thlentu lian tak a ni ngei dawn a ni.

A dam ṭhat a, a khelh chhoh vat a nih chuan, a khingpui tur midfielder dangte pawhin King-a ngaihdan hi an rawn ṭanpui ve thuai a rinawm a, mahse tunah chuan a hma anga khingpui ni tawh lovin, kawr sen ha chungin an hmachhawn tawh thung dawn a ni.